کراچی میں موسلادھار بارش، کئی سڑکیں تالاب بن گئیں ،حادثات میں 5 افراد جاں بحق

کراچی: شہر قائد کے مختلف علاقوں میں موسلادھار بارش سے کئی سڑکیں تالاب بن گئیں، اہم شاہراہوں پر ٹریفک کی روانی متاثر ہو گئی، تیز ہوائوں سے درخت زمین سے اکھڑ گئے جبکہ مختلف حادثات میں 5 افراد جاں بحق ہو گئے ۔

سسٹم کے زیر اثر ڈیفنس، کورنگی، قیوم آباد، صدر، کیماڑی، کلفٹن، شارع فیصل، ملیر، گلستان جوہر، طارق روڈ، گلشن اقبال، میٹ کمپلیکس، بلدیہ سمیت دیگر علاقوں میں بارش ہوئی۔

شہر میں موسلادھار بارش کے باعث مختلف علاقوں میں اربن فلڈںگ کی صورتحال پیدا ہوگئی، جس کے باعث شارع فیصل پر درجنوں گاڑیاں پھنسی رہیں۔

نیپا چورنگی، لیاقت آباد 10 نمبر، گلشن چورنگی، جیل چورنگی اور گرومندر پر پانی جمع ہوگیا جبکہ شارع فیصل کے کئی مقامات پر بارش کا پانی جمع ہوگیا۔ یونیورسٹی روڈ پر بھی برساتی پانی جمع ہوگیا۔

محکمہ موسمیات کے مطابق جمعے کو بھی کراچی سمیت دیہی سندھ کے مختلف اضلاع میں بارش ہونے کی توقع ہے، نیا سسٹم 4 اپریل تک برقرار رہ سکتا ہے۔

محکمہ موسمیات کا کہنا ہے کہ ہوائیں 13 کلو میٹر فی گھنٹہ کی رفتار سے چل رہی ہیں، جبکہ ہوا میں نمی کا تناسب 81 فیصد ریکارڈ کیا گیا ہے، جس کے باعث موسم میں خنکی محسوس کی جا رہی ہے۔

دوسری جانب فضائی معیار میں بھی بہتری دیکھنے میں آئی ہے اور شہر کا اے کیو آئی آج نسبتاً بہتر سطح پر ہے، جس سے شہریوں کو کچھ حد تک ریلیف ملا ہے۔