جڑواں شہروں میں احتجاج کا اعلان، اڈیالہ جیل اور 26 نمبر کے اطراف سیکیورٹی سخت

راولپنڈی، اسلام آباد: ایک سیاسی جماعت کی جانب سے آج 2 جون 2026 کو جڑواں شہروں میں احتجاج کے اعلان کے بعد سیکیورٹی ہائی الرٹ کر دی گئی ہے جبکہ مختلف اہم شاہراہوں پر ٹریفک کی روانی متاثر ہونے کا خدشہ ظاہر کیا جا رہا ہے۔

ذرائع کے مطابق احتجاج کے بعد موٹروے ایم ون، 26 نمبر چونگی اور اسلام آباد کی جانب جانے والی متعدد سڑکیں بند کیے جانے کا امکان ہے۔ اڈیالہ جیل کے باہر بھی احتجاجی اجتماع متوقع ہے جس کے پیش نظر سیکیورٹی انتظامات مزید سخت کر دیے گئے ہیں۔

انتظامیہ کا کہنا ہے کہ اڈیالہ روڈ، اڈیالہ جیل کے اطراف، گورکھپور چیک پوائنٹ، ملحقہ رابطہ سڑکوں اور راولپنڈی کے قریبی علاقوں میں ٹریفک کا دباؤ بڑھ سکتا ہے، جس کے باعث گاڑیوں کی رفتار سست، آمدورفت محدود اور معمول کے سفر میں رکاوٹ پیش آ سکتی ہے۔

موجودہ صورتحال کے مطابق 26 نمبر چونگی پر پولیس کی بھاری نفری تعینات ہے جبکہ فی الحال تمام سڑکیں ٹریفک کے لیے کھلی ہیں۔

شہریوں کو ہدایت کی گئی ہے کہ متاثرہ علاقوں میں غیر ضروری سفر سے گریز کریں، ممکن ہو تو متبادل راستے اختیار کریں اور ضروری سفر کی صورت میں اضافی وقت رکھیں۔ ٹریفک پولیس اور متعلقہ اداروں کی جانب سے جاری ہدایات پر عمل کرنے کی بھی اپیل کی گئی ہے۔