تفتان بارڈر پر تجارتی ویزا سہولت بحال

پاکستان اور ایران کے درمیان سرحدی تجارت کے فروغ کے لیے تفتان بارڈر پر تجارتی ویزا سہولت دوبارہ فعال کر دی گئی ہے۔ بلوچستان ہوم ڈیپارٹمنٹ کے نوٹیفکیشن کے بعد پاکستانی تاجروں کو ایران کے ساتھ تجارتی سرگرمیاں دوبارہ شروع کرنے میں آسانی میسر آئے گی۔

حکام کے مطابق تجارتی ویزا سہولت کی بحالی سے پاک ایران سرحدی تجارت میں اضافہ، کاروباری روابط میں بہتری اور روزگار کے نئے مواقع پیدا ہونے کی توقع ہے۔ اس اقدام کو دونوں ممالک کے درمیان اقتصادی تعاون کو مضبوط بنانے کی جانب اہم پیش رفت قرار دیا جا رہا ہے۔

تاجروں اور کاروباری حلقوں نے تقریباً ایک سال بعد ویزا سہولت کی بحالی کا خیر مقدم کرتے ہوئے اسے تجارت اور معیشت کے لیے مثبت قدم قرار دیا ہے۔ ان کا کہنا ہے کہ اس فیصلے سے سرحدی علاقوں میں کاروباری سرگرمیوں کو فروغ ملے گا اور مقامی معیشت کو بھی فائدہ پہنچے گا۔

تاجر برادری نے امید ظاہر کی ہے کہ ویزا سہولت کی بحالی کے بعد دوطرفہ تجارت کے حجم میں اضافہ ہوگا اور پاک ایران اقتصادی تعلقات مزید مستحکم ہوں گے۔