فیلڈ مارشل اور وزیر اعظم کی قیادت میں پاکستان نے عالمی سطح پر مقام بنایا:خواجہ آصف

وزیرِ دفاع خواجہ محمد آصف نے کہا ہے کہ پاکستان نے حالیہ عرصے میں عالمی سطح پر اپنی سفارتی اہمیت اور وقار میں نمایاں اضافہ کیا ہے، جس کا کریڈٹ ملکی قیادت کی مؤثر پالیسیوں کو جاتا ہے۔

اسلام آباد میں میڈیا سے گفتگو کرتے ہوئے انہوں نے کہا کہ پاکستان اور ایران کے تعلقات مزید مضبوط ہو رہے ہیں اور خطے میں کشیدگی کے خاتمے کے لیے پاکستان نے مثبت اور فعال کردار ادا کیا ہے۔

خواجہ آصف کا کہنا تھا کہ پاکستان کی امن پسند سفارت کاری کو عالمی سطح پر سراہا جا رہا ہے، جبکہ بعض عناصر پاکستان کے بڑھتے ہوئے سفارتی اثرورسوخ سے خوش نہیں ہیں۔ انہوں نے واضح کیا کہ اگر پاکستان کے خلاف کسی قسم کی جارحیت کی گئی تو اس کا بھرپور جواب دیا جائے گا۔

وزیر دفاع نے کہا کہ مسلم دنیا پاکستان کے کردار کو قدر کی نگاہ سے دیکھ رہی ہے اور خلیجی خطے میں امن و استحکام کے لیے پاکستان کی کوششیں قابلِ تحسین ہیں۔

انہوں نے افغانستان کے ساتھ بہتر تعلقات کی خواہش کا اظہار کرتے ہوئے کہا کہ پاکستان ہمیشہ پرامن اور برادرانہ روابط کا حامی رہا ہے۔ ان کے مطابق پاکستان نے کئی دہائیوں تک افغان عوام کی میزبانی کی اور انہیں مختلف شعبوں میں سہولیات فراہم کیں۔

خواجہ آصف نے مزید کہا کہ پاکستان عالمی سطح پر امن، استحکام اور ترقی کے فروغ کے لیے اپنا مثبت کردار ادا کرتا رہے گا اور عالمی برادری بھی اس کوشش کو تسلیم کر رہی ہے۔