ژوب میں مسافر بس کھائی میں گر گئی۔ 24 افراد جاں بحق
بلوچستان میں افسوسناک ٹریفک حادثہ، خواتین اور بچوں سمیت متعدد افراد زخمی
July 3, 2026 · قومی
بلوچستان کے ضلع ژوب کے علاقے داناسر میں ایک مسافر بس کھائی میں گرنے سے کم از کم 24 افراد جاں بحق جبکہ 20 زخمی ہو گئے۔
پولیس کے مطابق حادثے کا شکار ہونے والی بس کوئٹہ سے پشاور جا رہی تھی کہ راستے میں بریک فیل ہونے کے باعث ڈرائیور گاڑی پر قابو نہ رکھ سکا، جس کے نتیجے میں بس گہری کھائی میں جا گری۔
ریسکیو اور پولیس اہلکاروں نے فوری طور پر امدادی کارروائیاں شروع کرکے زخمیوں اور لاشوں کو نکالا۔ زخمیوں میں خواتین اور بچے بھی شامل ہیں، جنہیں طبی امداد کے لیے ڈسٹرکٹ ہیڈ کوارٹر (ڈی ایچ کیو) اسپتال منتقل کر دیا گیا ہے۔
حکام کے مطابق حادثے کی مزید تحقیقات جاری ہیں، جبکہ زخمیوں میں سے بعض کی حالت تشویشناک بتائی جا رہی ہے۔