سندھ طاس معاہدے پر کوئی سمجھوتہ نہیں ہوگا،بلاول بھٹو زرداری

گلگت: چیئرمین پاکستان پیپلز پارٹی بلاول بھٹو زرداری نے کہا ہے کہ سندھ طاس معاہدے پر کسی قسم کا سمجھوتہ نہیں کیا جائے گا اور قومی مفاد کے تحفظ کے لیے ہر ممکن اقدام کیا جائے گا۔

گلگت بلتستان میں نومنتخب وزیراعلیٰ کی حلف برداری کی تقریب سے خطاب کرتے ہوئے بلاول بھٹو زرداری نے کہا کہ گلگت بلتستان کے عوام نے اپنی قربانیوں اور جدوجہد سے تاریخ میں نمایاں مقام حاصل کیا ہے اور وہ ہمیشہ پاکستان سے اپنی وابستگی کا عملی ثبوت دیتے آئے ہیں۔

انہوں نے کہا کہ پاکستان پیپلز پارٹی عوام کے اعتماد کو اپنی ذمہ داری سمجھتی ہے اور گلگت بلتستان کے عوام کے مسائل کے حل، نوجوانوں کو روزگار کے مواقع فراہم کرنے اور خطے کی ترقی کے لیے عملی اقدامات کیے جائیں گے۔

بلاول بھٹو زرداری نے کہا کہ ملک میں سیاسی اختلافات کے باوجود تمام جماعتوں کو قومی مفاد کے لیے مل کر کام کرنا چاہیے۔ انہوں نے گلگت بلتستان کے انتخابی نتائج کو تسلیم کرنے پر وزیراعظم شہباز شریف اور مسلم لیگ (ن) کا شکریہ بھی ادا کیا۔

بھارت سے متعلق گفتگو کرتے ہوئے انہوں نے کہا کہ پاکستان اپنی سلامتی اور خودمختاری پر کوئی سمجھوتہ نہیں کرے گا۔ ان کا کہنا تھا کہ بھارت اگر پانی کو دباؤ کے ہتھیار کے طور پر استعمال کرنے کی کوشش کرتا ہے تو پاکستان اپنے حقوق کے تحفظ کے لیے ہر ممکن اقدام کرے گا۔

چیئرمین پیپلز پارٹی نے کہا کہ سندھ طاس معاہدہ پاکستان کے لیے انتہائی اہم ہے اور اس پر کسی قسم کا سمجھوتہ نہیں کیا جائے گا۔ انہوں نے مزید کہا کہ ملک کے دفاع اور قومی مفادات کے تحفظ کے لیے پوری قوم متحد ہے۔

خطاب کے دوران بلاول بھٹو زرداری نے خطے کی حالیہ صورتحال کا بھی ذکر کیا اور کہا کہ پاکستان امن کا خواہاں ہے، تاہم قومی سلامتی اور خودمختاری کے معاملے پر ہر ضروری قدم اٹھانے کی صلاحیت رکھتا ہے۔