ملتان۔ ڈی جی خان۔ بہاولنگر میں موسلادھار بارش۔ موسم خوشگوار ہوگیا

پنجاب کے مختلف شہروں میں تیز ہواؤں کے ساتھ ہونے والی موسلادھار بارش نے شدید گرمی اور حبس کا زور توڑ دیا، جبکہ کئی علاقوں میں موسم خوشگوار ہوگیا۔

ملتان، ڈی جی خان اور بہاولنگر میں تیز ہواؤں کے ساتھ بارش ریکارڈ کی گئی، جس کے باعث درجہ حرارت میں نمایاں کمی آئی۔ بعض نشیبی علاقوں میں پانی جمع ہونے سے ٹریفک کی روانی بھی متاثر ہوئی، جبکہ شہریوں نے موسم کی تبدیلی پر اطمینان کا اظہار کیا۔

محکمہ موسمیات کے مطابق آئندہ 24 گھنٹوں کے دوران اسلام آباد، پنجاب، خیبرپختونخوا، گلگت بلتستان اور آزاد کشمیر میں تیز ہواؤں، آندھی اور گرج چمک کے ساتھ مزید بارش کا امکان ہے۔ بعض مقامات پر موسلادھار بارش اور ژالہ باری بھی ہو سکتی ہے۔

محکمہ موسمیات نے خبردار کیا ہے کہ تیز ہواؤں اور شدید بارش کے باعث کمزور تعمیرات، درختوں اور بجلی کی تنصیبات کو نقصان پہنچ سکتا ہے، اس لیے شہری احتیاطی تدابیر اختیار کریں۔

دوسری جانب سندھ اور بلوچستان کے بیشتر علاقوں میں موسم گرم اور مرطوب رہنے کی پیش گوئی کی گئی ہے، تاہم چند مقامات پر شام یا رات کے اوقات میں گرج چمک کے ساتھ بارش کا امکان بھی موجود ہے۔