بلاول بھٹو کی کشمیری عوام سے ووٹ کی اپیل،اپنا فیصلہ خود کریں
اگر کشمیری چاہتے ہیں کہ ان کے مستقبل کا فیصلہ وہ خود کریں تو انہیں گھروں سے نکل کر حق رائے دہی استعمال کرنا ہوگا
میرپور: پاکستان پیپلز پارٹی کے چیئرمین بلاول بھٹو زرداری نے آصفہ بھٹو زرداری کے ہمراہ میرپور کے عوام کے نام ویڈیو پیغام جاری کرتے ہوئے کشمیری عوام سے ووٹ کے ذریعے اپنا فیصلہ خود کرنے کی اپیل کی ہے۔
بلاول بھٹو زرداری نے اپنے پیغام میں کہا کہ اگر کشمیری چاہتے ہیں کہ ان کے مستقبل کا فیصلہ وہ خود کریں تو انہیں گھروں سے نکل کر حق رائے دہی استعمال کرنا ہوگا۔ انہوں نے ووٹرز سے پاکستان پیپلز پارٹی کے انتخابی نشان “تیر” پر مہر لگانے اور پارٹی امیدواروں کی حمایت کی اپیل بھی کی۔
دوسری جانب آزاد کشمیر قانون ساز اسمبلی کے انتخابات کے پہلے مرحلے کی پولنگ صبح 8 بجے سے شروع ہوئی، جو شام 5 بجے تک جاری رہے گی۔
Election Day in Mirpur. If you want your rights come and vote for it. Vote for arrow. Kashmir ka Faisla Kashmir ka. #MirpurMainTeerChaleyGa pic.twitter.com/HFHhEC3dp6
— Bilawal Bhutto Zardari (@BBhuttoZardari) July 27, 2026
انتخابی عمل کے دوران ضلع کوٹلی کے اگہار کالونی میں قائم پولنگ اسٹیشن نمبر 36 اور 37 پر ابتدائی اوقات میں ووٹرز کی عدم آمد کے باعث پولنگ کا آغاز نہ ہو سکا۔
ادھر کمشنر میرپور راجہ طاہر ممتاز اور ڈی آئی جی کامران علی نے حلقہ ایل اے 3 کے مختلف پولنگ اسٹیشنوں کا دورہ کیا اور انتخابی انتظامات کا جائزہ لیا۔
اس موقع پر میڈیا سے گفتگو کرتے ہوئے کمشنر میرپور نے کہا کہ تینوں اضلاع میں مجموعی طور پر پولنگ کا عمل پرامن انداز میں جاری ہے۔ انہوں نے عوام سے گھروں سے نکل کر ووٹ ڈالنے کی اپیل کرتے ہوئے یقین دلایا کہ انتظامیہ کی جانب سے پرامن اور محفوظ ماحول فراہم کیا جا رہا ہے۔