پاک بحریہ کا کامیاب ریسکیو آپریشن،19 ماہی گیر محفوظ بچا لیے گئے
ماہی گیر کشتی گوادر سے تقریباً 120 ناٹیکل میل جنوب میں فنی خرابی کے باعث سمندر میں پھنس گئی تھی
پاک بحریہ نے شمالی بحیرۂ عرب میں ایک کامیاب سرچ اینڈ ریسکیو آپریشن کے دوران سمندر میں پھنسے 19 ماہی گیروں کو بحفاظت بچا لیا۔
ترجمان پاک بحریہ کے مطابق بحری جہاز پی این ایس تیمور نے شمالی بحیرۂ عرب میں انجن کی خرابی کے باعث پھنس جانے والی ایک ماہی گیر کشتی تک بروقت رسائی حاصل کی اور امدادی کارروائی انجام دی۔
حکام کے مطابق ماہی گیر کشتی گوادر سے تقریباً 120 ناٹیکل میل جنوب میں فنی خرابی کے باعث سمندر میں پھنس گئی تھی۔ کشتی میں سوار تمام 19 افراد کو محفوظ ریسکیو کر لیا گیا، جن میں 11 پاکستانی اور 8 ایرانی شہری شامل تھے۔
Pakistan Navy successfully rescued fishing vessel AL JALALI, stranded about 120 NM south of Gwadar after engine failure. The rescue operation, coordinated through JMICC, ensured the safety of all 19 crew members, including 11 Pakistanis and 8 Iranians. 1/2 pic.twitter.com/RWg5yqTlUj
— DGPR (Navy) (@dgprPaknavy) July 30, 2026
بتایا گیا ہے کہ سرچ اینڈ ریسکیو آپریشن کا آغاز جوائنٹ میری ٹائم انفارمیشن کوآرڈی نیشن سینٹر کی جانب سے موصول ہونے والی اطلاع کے بعد کیا گیا۔ پاک بحریہ کے اہلکاروں نے متاثرہ افراد کو خوراک، پینے کا صاف پانی اور ضروری طبی امداد بھی فراہم کی۔
بعد ازاں خراب کشتی کو بھی بحفاظت ساحل تک منتقل کر دیا گیا۔ پاک بحریہ کا کہنا ہے کہ یہ کامیاب آپریشن سمندر میں انسانی جانوں کے تحفظ، بروقت امدادی کارروائی اور ہر وقت آپریشنل تیاری کے عزم کی عکاسی کرتا ہے۔