مکہ مشترکہ معاہدے پر پوری قوم کو فخر ہے: علی پرویز ملک

اسلام آباد: وفاقی وزیر پیٹرولیم علی پرویز ملک نے کہا ہے کہ وزیراعظم شہباز شریف نے مشکل اور اہم فیصلے کرکے پاکستان کو ترقی کی سمت گامزن کیا۔

اپنے بیان میں علی پرویز ملک نے کہا کہ مسلم لیگ ن عملی سیاست اور قومی مفاد میں فیصلوں پر یقین رکھتی ہے۔ ان کے مطابق سابق وزیراعظم نواز شریف کی قیادت میں پاکستان نے ایٹمی طاقت بن کر اپنی دفاعی صلاحیت کو مضبوط کیا اور ملک کو ناقابل تسخیر بنانے میں اہم کردار ادا کیا۔

وفاقی وزیر نے پاکستان، سعودی عرب اور ترکیہ کے درمیان ہونے والے مکہ مشترکہ معاہدے کو بھی خوش آئند قرار دیتے ہوئے کہا کہ اس پیش رفت پر پوری قوم کو فخر ہے۔ ان کا کہنا تھا کہ اب پاکستان کے لیے اگلا اہم ہدف معاشی میدان میں کامیابیاں حاصل کرنا ہونا چاہیے۔

علی پرویز ملک نے کہا کہ پاکستان خطے میں امن اور سلامتی کے حوالے سے ایک اہم کردار ادا کرنے کی صلاحیت رکھتا ہے۔ ان کے مطابق پاک فوج کی پیشہ ورانہ مہارت اور دفاعی صلاحیتوں کا عالمی سطح پر اعتراف کیا جاتا ہے۔

وفاقی وزیر نے مزید کہا کہ ایران اور امریکا کے درمیان جنگ کے دوران پاکستان کو معاشی سطح پر مختلف چیلنجز کا سامنا کرنا پڑا، تاہم ملک کو معاشی استحکام کی جانب آگے بڑھانے کے لیے مسلسل کوششیں جاری رہنی چاہئیں۔