لاہور میں تیز رفتار کار کا خوفناک حادثہ، 5 افراد جاں بحق
جاں بحق افراد کی شناخت 15 سالہ مزمل، 18 سالہ نعمان، 20 سالہ عبدالرحمن، 17 سالہ فرقان اور 19 سالہ جنید کے نام سے ہوئی ہے۔
لاہور کے علاقے ہربنس پورہ میں کنال روڈ پر تیز رفتار کار بے قابو ہو کر درخت سے جا ٹکرائی، جس کے نتیجے میں 5 افراد جاں بحق جبکہ ایک بچہ زخمی ہوگیا۔
ریسکیو حکام کے مطابق حادثہ مبینہ طور پر تیز رفتاری کے باعث پیش آیا۔ کار بے قابو ہونے کے بعد سڑک کنارے موجود درخت سے ٹکرا گئی۔ حادثے کی شدت کے باعث کار میں سوار افراد شدید زخمی ہوئے، جبکہ دو راہگیر بھی حادثے کی زد میں آکر جان کی بازی ہار گئے۔
ریسکیو ٹیموں نے اطلاع ملتے ہی جائے حادثہ پر پہنچ کر امدادی کارروائی شروع کی۔ حادثے میں زخمی ہونے والے افراد کو فوری طور پر طبی امداد فراہم کی گئی، تاہم 5 افراد جانبر نہ ہوسکے۔
حکام کے مطابق جاں بحق افراد کی شناخت 15 سالہ مزمل، 18 سالہ نعمان، 20 سالہ عبدالرحمن، 17 سالہ فرقان اور 19 سالہ جنید کے نام سے ہوئی ہے۔
تیز رفتاری اور لاپرواہی کا بھیانک انجام۔
آج علی الصبح کینال روڈ پر ہربنس پورہ کے قریب تیز رفتار کار بے قابو ہو کو نہر کنارے واک کرتے 2 شہریوں کو روندتے ہوۓ برلب نہر لگے درختوں کو توڑتی ہوئی نیچے جا گری۔دونوں راہگیر اور کار سوار ہلاک۔ریسکیو 1122 اور پولیس موقع پر پہنچ گیی۔ pic.twitter.com/imBLmAR7y6
— Muhammad Usman Ilyas (@Usmanilyasskp) August 15, 2026
حادثے میں زخمی ہونے والے بچے کو طبی امداد کے لیے اسپتال منتقل کر دیا گیا، جہاں اس کا علاج جاری ہے۔ جاں بحق افراد کی لاشیں بھی ضروری کارروائی کے لیے سروسز اسپتال منتقل کردی گئی ہیں۔
ریسکیو حکام کے مطابق امدادی کارروائی مکمل کرلی گئی ہے، جبکہ حادثے کی وجوہات جاننے کے لیے مزید تحقیقات کی جا رہی ہیں۔ ابتدائی طور پر تیز رفتاری کو حادثے کی بنیادی وجہ قرار دیا جا رہا ہے۔