14 سال بعد اسلام آباد پولیس کو نئی گاڑیاں مل گئیں

اسلام آباد پولیس کے 27 تھانوں کے لیے 30 نئی گاڑیاں فراہم کردی گئی ہیں، جبکہ پولیس میں نفری کی کمی پوری کرنے کے لیے 9 ہزار نئے اہلکار بھرتی کرنے کا منصوبہ بھی سامنے آیا ہے۔

نئی گاڑیوں کی فراہمی کے حوالے سے اسلام آباد میں تقریب منعقد ہوئی، جہاں وفاقی وزیر داخلہ محسن نقوی اور وزیر مملکت طلال چوہدری نے پولیس حکام کو گاڑیوں کی چابیاں حوالے کیں۔

تقریب سے خطاب میں محسن نقوی نے کہا کہ پرانی اور خراب گاڑیوں کے ذریعے جدید پولیسنگ کے تقاضے پورے کرنا مشکل ہے۔ نئی گاڑیوں اور دیگر ضروری سہولیات کی فراہمی سے پولیس کی کارکردگی اور ہنگامی حالات میں فوری کارروائی کی صلاحیت بہتر ہوگی۔

انہوں نے کہا کہ شہریوں کے تحفظ کے لیے اسلام آباد پولیس کو جدید وسائل فراہم کیے جا رہے ہیں۔ پولیس اہلکاروں کو بہتر سہولیات ملنے سے وہ اپنی ذمہ داریاں زیادہ مؤثر انداز میں انجام دے سکیں گے۔

وفاقی وزیر داخلہ کے مطابق دارالحکومت کے تھانوں کی تعمیر، مرمت اور بہتری کا عمل بھی جاری ہے، جبکہ اسے جلد مکمل کرنے کی کوشش کی جا رہی ہے۔ انہوں نے بتایا کہ الیکٹرک گاڑیوں کا استعمال ماحول دوست اقدامات کا حصہ ہے اور اس سے پولیس کے ایندھن کے اخراجات میں بھی کمی لانے میں مدد ملے گی۔

وزیر مملکت طلال چوہدری نے بتایا کہ اسلام آباد کے تمام 27 تھانوں کو نئی گاڑیاں فراہم کی گئی ہیں۔ ان کے مطابق پولیس کی متعدد گاڑیاں طویل عرصے سے استعمال میں تھیں اور بعض تقریباً 14 سال پرانی ہوچکی تھیں، جس کے باعث نئی گاڑیوں کی ضرورت محسوس کی جارہی تھی۔

انہوں نے کہا کہ پولیس افسران کے لیے سفری و انتظامی سہولیات بہتر بنانے کے ساتھ رہائش کے منصوبوں پر بھی کام کیا جا رہا ہے۔ تمام تھانوں کی تعمیر اور بحالی کا کام رواں سال مکمل کرنے کا ہدف رکھا گیا ہے۔

طلال چوہدری کے مطابق اسلام آباد پولیس میں اہلکاروں کی کمی دور کرنے کے لیے 9 ہزار نئی بھرتیاں کی جائیں گی۔ انہوں نے واضح کیا کہ بھرتی کے عمل میں میرٹ کو بنیادی ترجیح دی جائے گی۔

حکام کا کہنا ہے کہ نئی گاڑیوں، اضافی نفری، بہتر تھانوں اور دیگر سہولیات کی فراہمی سے اسلام آباد پولیس کی مجموعی کارکردگی میں بہتری متوقع ہے۔ ان اقدامات کا مقصد دارالحکومت میں شہریوں کو مزید مؤثر اور بروقت پولیس خدمات فراہم کرنا ہے۔

تقریب میں وزارت داخلہ کے اعلیٰ حکام، آئی جی اسلام آباد پولیس اور دیگر سینئر پولیس افسران بھی موجود تھے۔