سپریم کورٹ کے حکم کے بعد علیمہ خان کا مختصر بیان

اسلام آباد: سپریم کورٹ کی جانب سے بانی پی ٹی آئی عمران خان کو شفا انٹرنیشنل ہسپتال منتقل کرنے کے حکم کے بعد ان کی بہن علیمہ خان نے میڈیا سے مختصر گفتگو کی۔
علیمہ خان نے کہا کہ عدالت میں یقین دہانی کرائی گئی ہے کہ وہ میڈیا سے بات نہیں کریں گے، اس لیے وہ بھی عدالتی احکامات کی پابندی کریں گی۔
انہوں نے میڈیا نمائندوں سے تعاون کی درخواست کرتے ہوئے کہا کہ عدالت نے میڈیا سے گفتگو نہ کرنے کی ہدایت کی ہے اور وہ نہیں چاہتیں کہ کوئی ایسی بات کہی جائے جس سے عدالتی حکم کی خلاف ورزی ہو۔
سپریم کورٹ میں بانی پی ٹی آئی کی صحت، علاج، ہسپتال منتقلی اور اہل خانہ سے ملاقاتوں سے متعلق کیس کی سماعت ہوئی تھی۔ عدالت نے عمران خان کو شفا انٹرنیشنل ہسپتال منتقل کرنے اور ان کے مکمل طبی معائنے کے لیے میڈیکل بورڈ تشکیل دینے کی ہدایت کی۔

We have assured the court that we will not speak to the media, Imran Khan’s sister pic.twitter.com/rR9BBa6a2e

— Ihtisham Ul Haq (@iihtishamm) August 18, 2026

عدالت نے علاج اور طبی معاملات کو سیاسی سرگرمیوں سے الگ رکھنے پر بھی زور دیا۔ اہل خانہ اور وکلا کی جانب سے یقین دہانی کرائی گئی کہ عدالتی ہدایات کی پابندی کی جائے گی اور عمران خان کی صحت سے متعلق معاملے کو سیاسی مقاصد کے لیے استعمال نہیں کیا جائے گا۔

علیمہ خان کا کہنا تھا کہ موجودہ صورتحال میں وہ عدالتی ہدایات پر عمل کرنا چاہتی ہیں، اسی لیے میڈیا سے تفصیلی گفتگو سے گریز کر رہی ہیں۔
سپریم کورٹ کی ہدایت کے مطابق عمران خان کی صحت کا تفصیلی جائزہ لینے کے لیے میڈیکل بورڈ تشکیل دیا جائے گا، جبکہ کیس کی آئندہ سماعت 16 ستمبر کو ہوگی۔