میرے بیٹے کے کیس میں سندھ حکومت کی ٹیمپرنگ نظر آ رہی ہے:میر رضا کے والد
ہ کیس میں پولیس کی مبینہ نااہلی واضح طور پر سامنے آ رہی ہے اور اب تک ملزمان کی گرفتاری نہ ہونا اہل خانہ کے لیے شدید تشویش کا باعث ہے۔
کراچی: میر رضا کے قتل کے ملزمان کی عدم گرفتاری کے خلاف سٹی کورٹ میں وکلا کی جانب سے احتجاج کیا گیا، اس موقع پر مقتول کے والد میر حسین نے سندھ حکومت اور پولیس کی تفتیش پر شدید تحفظات کا اظہار کیا۔
میڈیا سے گفتگو کرتے ہوئے میر حسین نے الزام عائد کیا کہ ان کے بیٹے کے کیس میں سندھ حکومت کی جانب سے مبینہ طور پر شواہد اور تفتیش میں مداخلت نظر آ رہی ہے۔
انہوں نے کہا کہ ڈاکٹر اسامہ کو عہدے سے ہٹانے کی وجہ بھی سمجھ سے بالاتر ہے۔ ان کے بقول ایسا اس لیے کیا گیا تاکہ وہ کیس سے متعلق سوالات کے جواب نہ دے سکیں۔
میر حسین نے سوال اٹھایا کہ کس کے دباؤ پر صرف تصاویر کی بنیاد پر پوسٹ مارٹم رپورٹ تیار کی گئی۔ انہوں نے مطالبہ کیا کہ میر رضا کے قتل کی تحقیقات شفاف انداز میں کی جائیں اور تمام شواہد کو محفوظ رکھتے ہوئے ذمہ دار افراد کو قانون کے کٹہرے میں لایا جائے۔
مقتول کے والد کا مزید کہنا تھا کہ کیس میں پولیس کی مبینہ نااہلی واضح طور پر سامنے آ رہی ہے اور اب تک ملزمان کی گرفتاری نہ ہونا اہل خانہ کے لیے شدید تشویش کا باعث ہے۔
احتجاج کرنے والے وکلا نے بھی میر رضا کے قتل کے ملزمان کی فوری گرفتاری اور کیس کی شفاف تحقیقات کا مطالبہ کیا۔