میر رضا کیس: کراچی بار کا ڈی آئی جی ایسٹ اور ایس ایس پیز کو ہٹانے کا مطالبہ

کراچی بار ایسوسی ایشن نے میر رضا کیس کے حوالے سے ایک اہم مذمتی قرارداد منظور کرتے ہوئے ڈی آئی جی ایسٹ سمیت کیس سے وابستہ متعدد اعلیٰ پولیس افسران کو فوری طور پر عہدوں سے ہٹانے کا پرزور مطالبہ کیا ہے۔ وکلا رہنماؤں کا کہنا ہے کہ شفاف اور منصفانہ تحقیقات کے لیے متعلقہ افسران کا عہدوں سے الگ ہونا ناگزیر ہے۔

منظور کی گئی قرارداد کے مطابق کراچی بار نے ڈی آئی جی ایسٹ، ایس ایس پی سی آئی اے و ایس آئی یو، ایس ایس پی ایسٹ، ایس پی ایسٹ کے علاوہ ایس ایچ او فیروز آباد اور ایس آئی او فیروز آباد کی فوری برطرفی کا مطالبہ کیا ہے۔ وکلا نمائندوں نے واضح کیا کہ جب تک یہ افسران اپنے عہدوں پر براجمان رہیں گے، اس وقت تک میر رضا کیس میں آزادانہ پیش رفت ممکن نہیں ہے۔

کراچی بار ایسوسی ایشن نے مزید مطالبہ کیا ہے کہ ان تمام افسران کے خلاف فوری طور پر باضابطہ محکمانہ کارروائی عمل میں لائی جائے اور ایک غیر جانبدارانہ انکوائری شروع کی جائے۔ وکلا کے مطابق اس اقدام کا مقصد تفتیشی عمل کو کسی بھی قسم کی مداخلت، اثر و رسوخ اور شواہد کے ساتھ ممکنہ چھیڑ چھاڑ یا خرد برد سے محفوظ رکھنا ہے تاکہ مظلوم فریق کو ہر صورت شفاف انصاف کی فراہمی یقینی بنائی جا سکے۔