ڈیجیٹلائزیشن سے شفافیت اور عوامی اعتماد میں اضافہ ہوگا:شزا فاطمہ

اسلام آباد: وزیرِ مملکت برائے انفارمیشن ٹیکنالوجی شزا فاطمہ نے کہا ہے کہ حکومت ملک میں ڈیجیٹل مالیاتی نظام کو وسعت دینے اور عوام کو جدید ٹیکنالوجی سے منسلک کرنے کے لیے اقدامات کر رہی ہے۔

شزا فاطمہ کے مطابق مالیاتی شعبے کی ڈیجیٹل منتقلی سے مختلف معاملات میں شفافیت بہتر بنانے اور عوام کا اعتماد بڑھانے میں مدد مل سکتی ہے۔ حکومت ڈیجیٹل معیشت کے فروغ کو بھی اہم ترجیح سمجھتی ہے۔

انہوں نے کہا کہ ڈیجیٹل والٹس کے استعمال کو فروغ دینے اور مالیاتی نظام کو جدید تقاضوں سے ہم آہنگ کرنے پر خصوصی توجہ دی جا رہی ہے، تاکہ زیادہ سے زیادہ شہری جدید مالیاتی سہولتوں سے فائدہ اٹھا سکیں۔

وزیرِ مملکت نے خصوصی سرمایہ کاری سہولت کونسل کو ملکی ترقی اور سرمایہ کاری کے فروغ کے لیے اہم پلیٹ فارم قرار دیا۔ ان کا کہنا تھا کہ متعلقہ ادارے کونسل کے تحت باہمی تعاون سے کام کر رہے ہیں تاکہ سرمایہ کاری اور معاشی سرگرمیوں کو فروغ دیا جا سکے۔

شزا فاطمہ نے مزید کہا کہ ڈیجیٹل ٹیکنالوجی کا مؤثر استعمال ملکی معیشت کو جدید خطوط پر استوار کرنے اور عوام کے لیے نئی سہولتیں پیدا کرنے میں اہم کردار ادا کرسکتا ہے۔