سرکاری حج اسکیم کے تحت واجبات کی دوسری قسط کی وصولی کا آغاز

وفاقی وزارت مذہبی امور کے زیرانتظام سرکاری حج اسکیم کے تحت واجبات کی دوسری قسط کی وصولی کا آغاز کر دیا گیا ہے۔ ترجمان وزارت مذہبی امور کے مطابق سرکاری عازمین حج اپنی دوسری قسط 5 اکتوبر سے 20 اکتوبر تک جمع کرا سکیں گے۔

ترجمان نے مزید بتایا کہ دوسری قسط کی ادائیگی کا عمل پاک حج ایپ اور ڈیجیٹل حج پورٹل کے ذریعے انجام پائے گا۔ وزارت مذہبی امور کی جاری کردہ ہدایات کے مطابق، دوسری قسط جمع کرانے سے پہلے میڈیکل فٹنس سرٹیفکیٹ پاک حج ایپ یا ڈیجیٹل حج پورٹل پر اپ لوڈ کرنا لازمی قرار دیا گیا ہے۔

حکام نے واضح کیا ہے کہ مقررہ تاریخ یعنی 20 اکتوبر تک دوسری قسط جمع نہ کرانے کی صورت میں متعلقہ عازم حج کی درخواست منسوخ تصور ہوگی۔ درخواست منسوخ ہونے کی صورت میں پہلے سے جمع شدہ واجبات عازم حج کے اکاؤنٹ میں واپس کر دیے جائیں گے۔ اس کے علاوہ، حج پیکیج تبدیل کرنے کی سہولت مقررہ وقت پر بند کر دی گئی ہے اور پیکیج میں ترمیم کے خواہش مند عازمین کو ہدایت کی گئی ہے کہ وہ تمام کارروائی فوری طور پر مکمل کریں۔