عالمی اورمقامی صرافہ مارکیٹوں میں سونے کی قیمتوں میں دوبارہ اضافہ

عالمی اور مقامی منڈیوں میں سونے کی قیمتوں میں ایک بار پھر اضافہ ریکارڈ کیا گیا ہے۔ بین الاقوامی بلین مارکیٹ میں پیر کے روز سونے کی قیمتوں میں 12 ڈالر فی اونس کا اضافہ ہوا، جس کے نتیجے میں نئی عالمی قیمت 4150 ڈالر فی اونس کی سطح پر پہنچ گئی۔

عالمی مارکیٹ کے اثرات کے تحت مقامی صرافہ بازاروں میں بھی کاروباری ہفتے کے پہلے روز فی تولہ سونے کی قیمت میں 1200 روپے کا اضافہ دیکھا گیا۔ صرافہ ایسوسی ایشن کے اعداد و شمار کے مطابق اس اضافے کے بعد نئی قیمت 437536 روپے فی تولہ کی سطح پر آ گئی۔ اسی طرح مقامی سطح پر فی 10 گرام سونے کی قیمت 1029 روپے بڑھ کر 375116 روپے ہو گئی۔

دوسری جانب سونے کے ساتھ ساتھ چاندی کی قیمتوں میں بھی اضافے کا رجحان رہا۔ مقامی مارکیٹ میں فی تولہ چاندی کی قیمت 66 روپے کے اضافے سے 6588 روپے ہو گئی، جبکہ فی 10 گرام چاندی کی قیمت 57 روپے کے اضافے سے 5648 روپے کی سطح پر ریکارڈ کی گئی۔ ماہرین کا کہنا ہے کہ عالمی منڈی میں اتار چڑھاؤ کے باعث مقامی صرافہ مارکیٹوں میں بھی قیمتیں مسلسل تبدیل ہو رہی ہیں۔