2022 میں مولانا اور ایمل ولی نے مال بنانے کیلئے فوری الیکشن نہیں ہونے دیئے،خواجہ آصف

مسلم لیگ (ن) کے سینئر رہنما اور وزیر دفاع خواجہ آصف نے مولانا فضل الرحمان اور ایمل ولی خان پر تنقید کرتے ہوئے الزام عائد کیا ہے کہ دونوں رہنماؤں کی توجہ اصولوں کے بجائے مالی مفادات اور اقتدار پر مرکوز رہی ہے۔

ایک ٹی وی پروگرام میں میزبان شہزاد اقبال سے گفتگو کرتے ہوئے خواجہ آصف نے کہا کہ مولانا فضل الرحمان اور ایمل ولی خان پاکستان ڈیموکریٹک موومنٹ (پی ڈی ایم) کے اتحادی تھے۔ ان کے بقول، پی ڈی ایم حکومت کے قیام کے بعد اسٹیبلشمنٹ کی جانب سے فوری انتخابات کے حوالے سے ایک اجلاس بلایا گیا، تاہم دونوں رہنماؤں نے فوری انتخابات کی مخالفت کی۔

خواجہ آصف نے دعویٰ کیا کہ مولانا فضل الرحمان اور ایمل ولی خان اس وقت حکومت کو ایک سال مکمل کرنے کا موقع دینا چاہتے تھے۔ انہوں نے اس صورت حال پر تبصرہ کرتے ہوئے الزام لگایا کہ دونوں رہنماؤں کی ترجیحات میں مالی مفادات اور اقتدار اہم رہے ہیں۔

خواجہ آصف کے ان بیانات کے بعد پی ڈی ایم کے دورِ حکومت میں ہونے والے سیاسی فیصلوں اور اتحادی جماعتوں کے کردار سے متعلق بحث ایک بار پھر توجہ حاصل کر سکتی ہے۔