چیف جسٹس لاہور ہائیکورٹ کا فلاحی اقدام، وہاڑی میں جینڈر بیسڈ وائلنس متاثرین کیلئے کمرا قائم

لاہور ہائیکورٹ کی چیف جسٹس مس عالیہ نیلم کے فلاحی اقدامات کے سلسلے میں وہاڑی میں جینڈر بیسڈ وائلنس کے متاثرین کے لیے پہلے خصوصی کمرے کا قیام عمل میں لایا گیا ہے۔ اس اقدام کا بنیادی مقصد تشدد سے متاثرہ افراد کو ایک محفوظ، پُرسکون اور سازگار ماحول فراہم کرنا ہے تاکہ وہ بلاخوف اپنے مسائل اور شکایات بیان کر سکیں۔ اس مخصوص کمرے میں متاثرہ افراد کی رازداری اور مکمل تحفظ کو یقینی بنانے پر خصوصی توجہ دی گئی ہے۔

دستاویزات اور رپورٹ کے مطابق، چیف جسٹس عالیہ نیلم نے اپنے دوروں کے دوران پاکپتن اور وہاڑی سمیت مختلف عدالتی مراکز میں متعدد ترقیاتی اور فلاحی منصوبوں کا افتتاح کیا۔ ان فلاحی منصوبوں میں ای لائبریریاں، خواتین وکلا کے لیے لیڈی بار رومز، ڈے کیئر سینٹرز، سائلین کے لیے جدید ویٹنگ ایریاز اور سہولت مراکز شامل ہیں۔ ان اقدامات کا مقصد عدالتی سہولیات کو جدید خطوط پر استوار کرنا اور انصاف کے حصول کے لیے آنے والے شہریوں کی مشکلات کو کم کرنا ہے۔

عدالتی نظام میں بہتری اور بجلی کی بلاتعطل فراہمی کے لیے پاکپتن، وہاڑی، عارف والا، میلسی اور بورے والا کی عدالتوں اور بار رومز کو سولر انرجی پر منتقل کرنے کے اقدامات بھی کیے گئے ہیں۔ سولر توانائی کے استعمال سے لوڈشیڈنگ کے باعث عدالتی امور اور وکلا کی پیشہ ورانہ سرگرمیوں میں حائل رکاوٹوں کو کم کرنے میں مدد ملے گی۔ اس دوران پاکپتن، عارف والا، وہاڑی، میلسی اور بورے والا آمد پر وکلا تنظیموں کی جانب سے چیف جسٹس کا پرتپاک استقبال کیا گیا اور ان کی فلاحی کوششوں کو بھرپور انداز میں سراہا گیا۔