بلوچستان میں فورسز کی کارروائی، فتنہ الخوارج کا کمانڈر عادل شاہ ہلاک

بلوچستان کے علاقے قلعہ سیف اللہ میں سیکیورٹی فورسز نے آپریشن ردالفتنہ 3 کے دوران ایک اہم کارروائی کرتے ہوئے فتنہ الخوارج کے دہشت گرد کمانڈر عادل شاہ عرف درویش کو ہلاک کر دیا ہے۔ سیکیورٹی ذرائع کے مطابق ہلاک ہونے والا دہشت گرد کمانڈر دسمبر 2020 سے اس گروہ سے وابستہ تھا اور سال 2024 سے دہشت گرد گروہ کے مالی معاملات کی نگرانی کی ذمہ داریاں نبھا رہا تھا۔

دستاویزات اور سیکیورٹی ذرائع کے مطابق دہشت گرد کمانڈر غیرمقامی دہشت گردوں کو ژوب، شیرانی اور شعبان کے علاقوں میں مستقل رہائش فراہم کرنے میں معاونت کرتا تھا۔ عادل شاہ سال 2022 اور 2023 کے دوران سیکیورٹی فورسز پر ہونے والے حملوں اور اغوا برائے تاوان کے لیے بھتہ خوری کی وارداتوں میں بھی براہ راست ملوث رہا ہے۔ سرکاری ریکارڈ کے مطابق عادل شاہ کے خلاف انسداد دہشت گردی کی عدالتوں میں 19 ایف آئی آرز درج تھیں، جبکہ حکومت کی جانب سے اس کے سر کی قیمت 25 لاکھ روپے مقرر کی گئی تھی۔

دوسری جانب پاکستان انسٹی ٹیوٹ فار کانفلکٹ اینڈ سیکیورٹی اسٹڈیز کی نئی رپورٹ کے مطابق ملک بھر میں سیکیورٹی فورسز کی مؤثر کارروائیوں کے نتیجے میں گزشتہ 5 ہفتوں کے دوران دہشت گرد حملوں میں نمایاں کمی ریکارڈ کی گئی ہے۔ رپورٹ کے مطابق خیبر پختونخوا اور بلوچستان میں جاری کامیاب آپریشنز کے باعث دہشت گرد حملوں میں تقریباً 66 فیصد کمی واقع ہوئی ہے جبکہ صرف پچھلے 5 ہفتوں میں فورسز نے 10 آپریشنز کے دوران 33 عسکریت پسندوں کو ہلاک کیا ہے۔