مصر میں دو مسافر ٹرینوں کا شدید تصادم۔7 افرادہلاک اور 112زخمی

مصر کے شمالی علاقے میں دو مسافر ٹرینوں کے درمیان ایک خوفناک تصادم کے نتیجے میں کم از کم 7 افراد ہلاک اور 112 زخمی ہوگئے ہیں۔ حادثے کے بعد ٹرین کی متعدد بوگیاں پٹری سے اتر کر الٹ گئیں، جس سے علاقے میں شدید افرا تفری پھیل گئی۔

غیر ملکی میڈیا اور ریلوے حکام کی رپورٹس کے مطابق، گیزا سے فیوم نخلستان کی جانب جانے والی ایک مسافر ٹرین قاہرہ سے ملک کے جنوبی شہر اسوان کا سفر کرنے والی دوسری ٹرین سے ٹکرا گئی۔ حادثے کے فوری بعد جائے وقوعہ پر بڑے پیمانے پر امدادی کارروائیاں شروع کر دی گئیں اور زخمیوں کو قریبی اسپتالوں میں منتقل کیا گیا۔ حکام کی جانب سے خدشہ ظاہر کیا گیا ہے کہ بعض زخمیوں کی حالت نازک ہونے کے باعث ہلاکتوں میں مزید اضافہ ہو سکتا ہے۔

مصری صدر عبدالفتاح السیسی نے اس المناک واقعے کا سخت نوٹس لیتے ہوئے متعلقہ حکام کو فوری تحقیقات کا حکم دے دیا ہے۔ سرکاری بیانات کے مطابق، حادثے میں غفلت یا لاپرواہی کے مرتکب پائے جانے والے کسی بھی ذمہ دار فرد کو قانون کے کٹہرے میں لایا جائے گا اور کڑے احتساب کا سامنا کرنا ہوگا۔