امریکی عوام اسرائیل کو سخت ناپسند کرتے ہیں، ڈونلڈ ٹرمپ کا انکشاف

امریکی صدر ڈونلڈ ٹرمپ نے وسط مدتی انتخابات میں اپنی جماعت کو ہونے والے نقصان کی وجوہات بیان کرتے ہوئے کہا ہے کہ امریکی عوام میں اسرائیل کے لیے شدید ناپسندیدگی پائی جاتی ہے۔ ان کے مطابق ایران جنگ، ایندھن کی بڑھتی ہوئی قیمتوں اور اسرائیل مخالف جذبات نے ووٹروں کے انتخابی فیصلوں کو گہرا متاثر کیا۔

ٹرمپ نے انتخابی نتائج پر تبصرہ کرتے ہوئے مؤقف اختیار کیا کہ اگر وہ خود براہِ راست انتخابی میدان میں ہوتے تو نتائج بالکل مختلف ہوتے۔ ان کا کہنا تھا کہ ایران کے ساتھ جنگ اور بڑھتی ہوئی فیول قیمتوں کے علاوہ اسرائیل کے بارے میں امریکی عوام کے منفی جذبات بھی انتخابی نتائج پر اثرانداز ہوئے۔ امریکی صدر کے بیان میں ایران جنگ اور اسرائیل کے لیے امریکی عوام کی حمایت میں کمی کو انتخابی نقصان کی اہم محرک وجوہات کے طور پر پیش کیا گیا۔

دوسری جانب امریکی نشریاتی ادارے پر ڈونلڈ ٹرمپ کا انٹرویو نشر ہونے کے چند گھنٹے بعد ایرانی وزیر خارجہ عباس عراقچی نے اس کے ایک حصے پر سخت ردِعمل ظاہر کیا ہے۔ ایرانی وزیر خارجہ کا کہنا تھا کہ امریکی صدر بخوبی جانتے ہیں کہ امریکی عوام کی اکثریت اسرائیل سے سخت نالاں ہے، تاہم ٹرمپ عوامی ناراضی کی بنیادی وجوہات سمجھنے میں الجھن کا شکار دکھائی دیتے ہیں۔ انہوں نے مزید کہا کہ امریکی عوام اسرائیل کی جانب سے امریکا کو نہ ختم ہونے والی جنگوں میں دھکیلنے سے اب پوری طرح تنگ آ چکے ہیں اور مزید طویل جنگیں نہیں چاہتے۔

عباس عراقچی نے اس بات پر بھی زور دیا کہ مشرق وسطیٰ کے عوام بھی مسلسل جنگوں اور تنازعات سے اب تھک چکے ہیں۔ قبل ازیں امریکا کو مخاطب کرتے ہوئے انہوں نے کہا کہ امریکی ووٹرز اپنا فیصلہ واضح طور پر سنا چکے ہیں اور اب وائٹ ہاؤس کی باری ہے کہ وہ اپنی آئندہ کی راہ کا درست انتخاب کرے گی۔ انہوں نے دوٹوک الفاظ میں تنبیہ کی کہ اگر واشنگٹن نے جنگ کا راستہ اختیار کیا تو ایران کے الرٹ اور جنگی تجربہ رکھنے والے جنگجو اس کا بھرپور جواب دینے کی پوری صلاحیت رکھتے ہیں۔