خیبر پختونخوا ہاؤس میں مفت قیام پر نعیم حیدر پنجوتھا کو ساڑھے 26 لاکھ روپے کا نوٹس

خیبر پختونخوا ہاؤس میں مبینہ طور پر بلا معاوضہ رہائش اختیار کرنے کے معاملے پر تحریک انصاف کے رہنما نعیم حیدر پنجوتھا کو ساڑھے 26 لاکھ روپے کے واجبات کی ادائیگی کا نوٹس جاری کیے جانے کا دعویٰ سامنے آیا ہے، جس میں رقم فوری ادا کرنے کا حکم دیا گیا ہے۔

اطلاعات کے مطابق نعیم حیدر پنجوتھا خیبر پختونخوا ہاؤس میں مبینہ طور پر مفت رہائش کی سہولت سے مستفید ہوتے رہے، جس کا سلسلہ سہیل آفریدی کے دورِ حکومت میں بھی جاری رہنے کا دعویٰ کیا جا رہا ہے۔

اب خیبر پختونخوا ہاؤس میں قیام کرنے والے افراد کے ریکارڈ کی جانچ پڑتال اور واجب الادا رقوم کی وصولی کا عمل شروع ہونے کی اطلاعات ہیں۔ دعویٰ کیا گیا ہے کہ نعیم حیدر پنجوتھا کو بھی مبینہ مفت رہائش کے واجبات کی وصولی کے لیے نوٹس جاری کیا گیا ہے۔

دوسری جانب تحریک انصاف کے اندر بعض مفاد پرست عناصر کے کردار پر بھی سوالات اٹھائے جا رہے ہیں، جن پر اہم مواقع پر بااثر شخصیات کے ساتھ قربت ظاہر کرکے سیاسی اثر و رسوخ حاصل کرنے، پارٹی میں گروہ بندی اور ساتھیوں کو ایک دوسرے کے خلاف کرنے کے الزامات عائد ہوتے رہے ہیں۔

نعیم حیدر پنجوتھا کے حوالے سے بشریٰ بی بی کا نام استعمال کرنے، علیمہ خان کے ساتھ تصاویر بنوانے، سلمان اکرم راجہ کے قریبی ساتھی کی حیثیت سے سیاسی اثر و رسوخ قائم کرنے اور سہیل آفریدی کی وزارتِ اعلیٰ کے دوران مبینہ مراعات سے مستفید ہونے کے حوالے سے بھی سوالات سامنے آئے ہیں۔

خیبر پختونخوا ہاؤس میں سرکاری وسائل پر بلا استحقاق قیام کرنے والے تمام افراد کے ریکارڈ کی مکمل جانچ پڑتال اور قیام کے دنوں کے حساب سے واجبات کی وصولی کا مطالبہ بھی کیا جا رہا ہے۔
اس معاملے پر یہ سوال اٹھایا جا رہا ہے کہ سیاسی وابستگی، ذاتی تعلقات اور بااثر شخصیات سے قربت کی بنیاد پر سرکاری مراعات سے فائدہ اٹھانے کا حق کس نے دیا؟

سرکاری وسائل عوام کی امانت ہیں، کسی کی ذاتی جاگیر نہیں۔ اگر مفت رہائش اور سرکاری مراعات کے ناجائز استعمال کے الزامات درست ثابت ہوتے ہیں تو متعلقہ افراد سے مکمل واجبات وصول کیے جانے چاہئیں، خواہ ان کی سیاسی وابستگی یا اثر و رسوخ کچھ بھی ہو۔

تحریک انصاف کے اندر بھی مبینہ مفاد پرست کرداروں، گروہ بندی اور ذاتی مفادات کی سیاست کا سنجیدگی سے جائزہ لینے کی ضرورت پر زور دیا جا رہا ہے۔ پارٹی کے اندر احتساب اور سرکاری وسائل کے استعمال میں شفافیت کو ضروری قرار دیا جا رہا ہے۔