وزیراعظم کا انطالیہ میں موسمیاتی کانفرنس سے خطاب، گرین انرجی کے لیے عالمی تعاون پر زور

وزیراعظم محمد شہباز شریف نے ترکیے کے شہر انطالیہ میں اقوام متحدہ کی 31 ویں موسمیاتی تبدیلی کانفرنس (کوپ 31) کے موقع پر منعقدہ اعلیٰ سطح کے اجلاس سے خطاب کرتے ہوئے کہا ہے کہ پاکستان صاف توانائی کے ایجنڈے کو آگے بڑھانے اور پائیدار ترقی کے فروغ کے لیے پرعزم ہے۔ انہوں نے ترقی پذیر ممالک کو موسمیاتی تبدیلی سے متعلق اپنے وعدے پورے کرنے پر زور دیا اور عالمی برادری سے مطالبہ کیا کہ گرین انرجی کے اہداف کے حصول کے لیے بین الاقوامی مالی معاونت میں اضافہ اور سستی ٹیکنالوجی کی فراہمی یقینی بنائی جائے۔

سرکاری اعداد و شمار کے مطابق پاکستان کے توانائی کے مجموعی نظام میں صاف توانائی کے ذرائع کا حصہ اب تقریباً 55 فیصد ہو چکا ہے۔ اس کے علاوہ حال ہی میں افتتاح کیے جانے والے ساتویں جوہری بجلی گھر سے قومی گرڈ میں 1,200 میگاواٹ صاف بجلی شامل کی جائے گی۔ نئی آٹو پالیسی کے تحت 2030 تک نئی گاڑیوں میں سے 30 فیصد کو الیکٹرک گاڑیوں میں تبدیل کرنے کا ہدف مقرر کیا گیا ہے اور رواں سال فروخت ہونے والی ہر 10 موٹر سائیکلوں میں سے پہلی مرتبہ ایک سے زائد الیکٹرک موٹر سائیکلیں ہیں۔

وزیراعظم نے واضح کیا کہ پاکستان کو 2035 تک کم کاربن اخراج کے حامل بجلی پیدا کرنے کے منصوبوں کے لیے تقریباً 138 ارب ڈالر درکار ہیں جبکہ کوئلے سے بجلی پیدا کرنے والے منصوبوں کی جگہ شمسی توانائی کے استعمال کے لیے مزید 50 ارب ڈالر کی ضرورت ہے۔ انہوں نے کہا کہ بھاری قرضوں میں جکڑی معیشت تنہا اس بوجھ کو برداشت نہیں کر سکتی اس لیے عالمی شراکت داروں کو رعایتی شرائط پر مالی معاونت فراہم کرنا ہوگی۔