بپتسمہ کرانے والا پادری مگرمچھ کا نشانہ بن گیا

ادیس آبابا:ایتھوپیا میں ایک مگرمچھ عیسائی پادری کو اس وقت اپنے خونخوار دانتوں میں دبا کر لے گیا جب وہ لوگوں کو بپتسمہ دے رہے تھے۔

بین الاقوامی میڈیارپورٹس کے مطابق پولیس اور مقامی لوگوں نے کہا ہے کہ مرکب تبائیعا ضلع میں پروٹیسٹنٹ پاسٹر ایشیٹے 80 لوگوں کے اجتماع کو ابایا جھیل میں بیپتسمہ دے رہے تھے کہ ایک بھوکے مگرمچھ نے ان پر حملہ کر دیا۔

مقامی لوگوں کا کہنا تھا جب پادری بپتسمہ دے چکے تو مگرمچھ نے چھلانگ لگا کر پادری کو اپنے طاقتور اور خونخوار جبڑوں میں پھنسا لیا اور گہرے پانی میں لے گیا۔

ایک مقامی شخص کیتما کیرو نے بتایا کہ مقامی لوگوں اور مچھیروں نے پادری کو مگرمچھ کے چنگل سے چھڑانے کی سرتوڑ کوشش کی لیکن وہ اس میں کامیاب نہ ہوسکے۔

مقامی لوگ پادری کی جان بچانے میں کامیاب تو نہیں ہوئے البتہ وہ اس کی لاش کو مگرمچھ سے چھڑا لائے۔

ایتھوپیا کی جھیل ابایا1100 کلومیٹر طویل ہے اور اسے مگر مچھوں کی بڑی آماجگاہ تصور کیا جاتا ہے۔