ایف آئی نےخدمت خلق فاؤنڈیشن کی گاڑیوں کی تفصیلات طلب کرلیں

ایم کیو ایم کے فلاحی ادارے خدمت خلق فاؤنڈیشن پر منی لانڈرنگ کیس کے حوالے سے ایف آئی اے نے اہم پیشرفت دکھاتے ہوئے ادارے کی گاڑیوں کی مکمل جانچ پڑتال کا فیصلہ کیا ہے۔

اس سلسلے میں ایف آئی اے انسداد دہشت گردی ونگ نے محکمہ ایکسائز کو خط لکھ کر ادارے کی 48 گاڑیوں کی تفصیلات طلب کی ہیں۔

خدمت خلق فاؤنڈیشن (کے کے ایف) منی لانڈرنگ کیس میں بانی متحدہ اور دیگر ملزمان کیخلاف اہم پیش رفت سامنے آئی ہے اور ایف آئی اے نے ’کے کے ایف‘ کی 48 گاڑیوں کی مکمل جانچ پڑتال کا فیصلہ کرلیا۔

فیڈرل انویسٹیگیشن ایجنسی کے انسداد دہشت گردی ونگ نے گاڑیوں کی تفصیلات کے لیے محکمہ ایکسائز اینڈ ٹیکسیشن کو خط لکھتے ہوئے استفسار کیا کہ خدمت خلق فاونڈیشن کی گاڑیاں کس کے نام ہیں؟۔

ایف آئی اے نے خدمت خلق فاونڈیشن کی 48 گاڑیوں کے نمبرز بھی فراہم کرتے ہوئے محکمہ ایکسائز کو کسی بھی گاڑی کی ملکیت تبدیل کرنے سے بھی روک دیا ہے۔ ایف آئی اے کے تفتیشی افسر نے خط کی نقول انسداد دہشتگردی کی خصوصی عدالت میں بھی جمع کرا دی ہے۔

واضح رہے کہ کچھ عرصہ قبل متحدہ قومی موومنٹ کے رہنماؤں کے خلاف خدمت خلق فاؤنڈیشن کے نام پر اربوں روپے کی منی لانڈرنگ اور رقوم لندن بھجوانے کا انکشاف ہوا تھا۔ ایف آئی اے کی جانب سے اس کیس کی تحقیقات کی جارہی ہیں۔