بھارتی فوج کی بلااشتعال فائرنگ۔ایک شہری شہید۔9زخمی

لائن آف کنٹرول پر بھارتی فوج کی بلااشتعال فائرنگ سے ایک شہری شہید جب کہ 9 افراد زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے ایک بار پھر سیز فائر معاہدے کی خلاف ورزی کرتے ہوئے اشتعال انگیزی کی ہے اور لائن آف کنٹرول کے ڈنا، دھدنیال، جورا، لیپا ، شردا اور شاہ کوٹ سیکٹرپرشہری آبادی کو نشانہ بنایا ہے۔

آئی ایس پی آرکے مطابق بھارتی فوج کے فائرنگ سے 26 سالہ نوجوان نعمان احمد شہید ہوگیا جب کہ 9 افراد زخمی ہوئے، زخمیوں میں خواتین اور بچے شامل ہیں،جنہیں اسپتال منتقل کردیا گیا ہے۔

آئی ایس پی آر کے مطابق پاکستانی فوج کی جانب سے بھی مؤثر جوابی کارروائی کی گئی ہے جس میں 3 بھارتی فوجیوں کی ہلاکت اور متعدد کی زخمی ہونے کی اطلاعات ہیں جب کہ بھارتی چوکیوں کو بھی شدید نقصان پہنچا۔