’ڈسنا نواز شریف کی فطرت ہے‘،ثنا اللہ زہری نے بھی ن لیگ چھوڑدی

سابق وزیر اعلیٰ بلوچستان نواب ثنا اللہ زہری نے بھی مسلم لیگ (ن) چھوڑنے کا اعلان کردیا۔
کوئٹہ میں جلسے سے خطاب میں ثنااللہ زہری نے پارٹی چھوڑنے اور ن لیگ کی سینٹرل ایگزیکٹو کمیٹی سے استعفیٰ دینے کا اعلان کیا۔
انہوں نے کہا کہ آج سے نواز شریف کی جس حد تک مخالفت ہوسکے گی کریں گے، آج سے نواز شریف سے ہمارا کوئی واسطہ نہیں۔
ان کا کہنا تھا کہ نواز شریف کا اصل روپ گلی گلی گھر گھر دکھائیں گے۔
انہوں نے کہا کہ عبدالقادر بلوچ کےساتھ تو ایسی بےوفائی کی کہ ان کا انتخابی حلقہ ہی توڑ دیاگیا، اس کے باوجود عبدالقادر بلوچ نے پارٹی سے وفاداری نبھائی۔
نواب ثنا اللہ زہری کا کہنا تھا کہ ڈسنا نواز شریف کی فطرت میں شامل ہے اور نواز شریف نے اپنے محسنوں کو بھی نہیں چھوڑا، ضیاء الحق کا بیٹا بھی نواز شریف کی بے وفائی کے قصے سناتا ہے۔
سابق وزیراعلیٰ کا کہنا تھا کہ نواز شریف تم نے ہم سے بےوفائی کی، تم نے باعزت آدمیوں کو بےعزت کرانے کی کوشش کی، لیڈر ایسے نہیں ہوتے جو بھگوڑے بن کر باہر بیٹھ جائیں۔