شیخ رشید کو تحریک لبیک کے معاملے پر بات کرنے سے روک دیا گیا

لاہور: وفاقی وزیر داخلہ شیخ رشید نے کہا ہے کہ وزیر اعظم نے مجھے تحریک لبیک کے معاملے پر بات کرنے سے روک دیا ہے،تحریک لبیک سے معاملات 2 وزرا دیکھ رہے ہیں وہی بات کریں گے۔

لاہور میں تقریب سے خطاب کے دوران شیخ رشید نے کہا کہ ریسکیو1122کی سروس شاندار ہے، سپریم کورٹ میں پاناما معاملے پر کیس لڑ رہا تھا تو یہ کہا تھا کہ یہ قطری خط نہیں ریسکیو 1122 ہے، ایک اسلام آباد بڑے بڑے لوگوں کا ہے اور دوسرا وہ اسلام آباد ہے جہاں غریب لوگ پلتے ہیں، اسلام آباد میں بلند و بالا عمارتیں تعمیر ہورہی ہیں، کثیرالمنزلہ عمارتوں میں آگ بجھانے کے لیے ٹیم کا ہونا ضروری ہے، اگلے ہفتے آپ کو اسلام آباد دعوت دیتے ہیں، ہم آپ کو 20 گاڑیاں دیں گے، اصل دین انسانیت کی خدمت اور انسانوں کی جان بچانا ہے۔

وفاقی وزیرداخلہ کا کہنا تھا کہ وزیر اعظم نے مجھے پیغام بھیجا ہے کہ تحریک لبیک کے معاملے پر بات نہ کریں، مجھ سے سعد رضوی کی بات چیت فرانس کے مسئلے پر ہوئی تھی، تحریک لبیک سے معاملات 2 وزرا دیکھ رہے ہیں وہی بات کریں گے۔

شیخ رشید نے کہا کہ اسٹیبلمشنٹ سے کس کے تعلقات بہتر ہو رہے ہیں مجھے علم نہیں، ریلوے موج کی وزارت تھی جب تک ٹرین نہ گرے تب تک کوئی نہیں پوچھتا ، وزارتیں آنی جانی چیز ہیں، چالیس سال سے وزیر ہوں اور یہ میری پندرہویں وزارت ہے عمران خان کے ساتھ کھڑا ہوں اورکھڑا رہوں گا، عمران خان پانچ سال پورے کریں گے۔