حکومت نےعوام پرپٹرول بم گرادیا

اسلام آباد:وفاقی حکومت نےعوام پرپٹرول بم گرادیا، بجلی کی قیمت8 روپے فی یونٹ بڑھانے کے بعد پٹرولیم مصنوعات کی قیمتوں میں فی لٹر30 روپے اضافہ کردیا۔

وفاقی وزیر خزانہ مفتاح اسماعیل نے پریس کانفرنس سے خطاب کرتے ہوئے پٹرولیم مصنوعات کی قیمتیں بڑھانے کا اعلان کیا جس کے بعد پٹرولیم مصنوعات کی قیمتیں تاریخ میں پہلی بار 200 روپے فی لٹر سے تجاوز کرگئیں۔مفتاح اسماعیل نے بتایا کہ پٹرول کی قیمت 30 روپے کے اضافے سے  209 روپے 86 پیسے ہوگئی ہے۔ ڈیزل کی قیمت 30 روپے بڑھ کر 204 روپے 15 پیسے اور مٹی کے تیل کی قیمت 181 روپے 94 پیسے ہوگئی ہے۔ قیمتوں میں اضافے کا اطلاق رات 12 بجے سے ہوگا۔

خیال رہے کہ ایک ہفتے کے دوران موجودہ حکومت نے پٹرولیم مصنوعات کی قیمتوں میں 60 روپے فی لٹر اضافہ کیا ہے۔ اس سے قبل 27 مئی کو بھی پٹرولیم مصنوعات کی قیمتیں 30 روپے فی لٹر بڑھائی گئی تھیں۔