پنجاب اورخیبر پختونخوا نے گندم لینے سے انکار کر دیا۔شہباز شریف

اسلام آباد:وزیراعظم شہباز شریف کا کہنا ہے کہ پنجاب اورخیبر پختونخوا گندم کی نئی فصل کے بیج پر سیاست نہ کریں،  فصل کی بوائی کے لیے وفاقی حکومت نے صوبوں کیساتھ مل کر منصوبہ بنایا کہ آدھے اضلاع میں وفاق اور آدھے اضلاع میں صوبے گندم کا بیج تقسیم کریں گے، مگر پنجاب اور خیبر پختونخوا نے گزارش کے باوجود بیج لینے سے انکارکردیا ۔

نجی ٹی وی کے مطابق شہباز شریف کی زیر صدارت نیشنل فلڈ رسپانس کوآرڈی نیشن سینٹر (این ایف آرسی سی) میں جائزہ اجلاس ہوا، جس میں ملک میں سیلابی صورتحال سے متعلق معاملات کا جائزہ لیا گیا، اجلاس میں شہباز شریف نے بتایا کہ70 ارب روپے بینظیر انکم سپورٹ پروگرام کے ذریعے تقسیم ہورہے ہیں، سیلاب پر کوئی سیاست نہیں،متاثرین کے لیے ہم سب کام کررہے ہیں، فورم کے ذریعے سب کچھ کیاجارہاہے۔

انہوں نے بتایا کہ گندم کی بوائی کے لیے وفاقی حکومت نے صوبوں کیساتھ مل کر منصوبہ بنایا کہ آدھے اضلاع میں صوبہ اور آدھے میں وفاق دے گا، سندھ اور بلوچستان نے بیج لینے پر رضامندی ظاہر کی، مگر پنجاب اور خیبر پختونخوا نے گزارش کے باوجود بیج لینے سے انکار کیا، آج پھر درخواست کررہا ہوں کہ بیج لیں، ہمیں اس پر سیاست سے پرہیز کرنا چاہیے۔

شہباز شریف نے کہا کہ اگر کے پی اور پنجاب بیج نہیں لینا چاہتے تو آپ کی مرضی ہے لیکن یہ مت کہیں کہ وفاق کچھ نہیں کر رہا، حقائق کو توڑ مروڑ کر پیش نہ کریں، قوم کو الجھن میں ڈالیں گے تو نقصان ہوگا، یہ کہا جارہا ہے کہ وفاقی حکومت نجی شعبے کو درآمد کی اجازت نہیں دے رہی، میں کسی کو درآمد کی اجازت نہیں دوں گا کہ کوئی اپنی مرضی کی قیمت پر درآمد کرلے، زرمبادلہ کے ذخائر بہت کم ہیں، ایمرجنسی حالات میں ایک ڈالر بھی فضول خرچ کرنے کے متحمل نہیں ہیں۔