بلاول بھٹو کے نبیل گبول کو پیچھے ہٹانے کی ویڈیو وائرل

کراچی (اسٹاف رپورٹر) چیئرمین پیپلزپارٹی بلاول بھٹو زرداری اورسینئرپارٹی رہنما نبیل گبول کی ایک ویڈیو وائرل ہوئی ہے جس میں بلاول بھٹو کونبیل گبول سے ہاتھ ملانے اوربات کرنے سے گریزاں دیکھا جا سکتا ہے،گزشتہ روز نومنتخب کراچی میئر، مرتضی وہاب کی تقریبِ حلف برداری کے دوران پیش آنے والی دلچسپ صورتحال کی یہ ویڈیو جہاں خبروں کی زینت بنی وہیں سوشل میڈیا پربھی جنگل کی آگ کی طرح پھیل گئی،وائرل ویڈیو میں دیکھا جاسکتا ہے کہ پہلی صف میں بیٹھے نبیل گبول نے بلاول بھٹو کے قریب آنیکی کوشش کی جس پرچیئرمین پیپلزپارٹی نے انہیں ہاتھ سے پیچھے ہٹاتے ہوئے بات کرنے سے روک دیا۔

بلاول بھٹو کا نبیل گبول سے ملنے سے انکار، گارڈ بلوا کر پیچھے ہٹا دیا#Pakistan #ImranKhan #NabeelGobol #BilawalBhutto #PPP #Karachi #MayorKarachi pic.twitter.com/K7a9XkA7OX

— The Pakistan Daily (@ThePakDaily) June 19, 2023

بلاول بھٹو کے نبیل گبول کوپیچھے ہٹانے کے بعد ایک کارکن نے آگے بڑھ کرنبیل گبول کو وہاں سے مزید پیچھے ہٹادیا،اس ویڈیو کے تناظرمیں اب سیاسی رہنما، نبیل گبول کے بیٹے نادرنبیل گبول نے مائیکروبلاگنگ ویب سائٹ ٹوئٹرپربلاول بھٹوکی ایک پرانی ویڈیو شیئرکی ہے،نادرنبیل گبول کا اپنی ٹوئٹ کے کیپشن میں لکھا کہ موجودہ وزیرخارجہ اورمستقبل کے وزیراعظم بلاول بھٹو زرداری نفیس انسان ہیں جو اپنے تمام کارکنان سے گرم جوشی اورمحبت سے ملتے ہیں۔

نادرکی جانب سے شیئرپرانی ویڈیو میں دیکھا جا سکتا ہے کہ بلاول بھٹو پہلے گرمجوشی سے بات کرتے ہوئے نادرگبول سے مصافحہ کرتے ہیں بعدازاں نادرکے ساتھ تصویربھی بنواتے ہیں،واضح رہے کہ گزشتہ روزوائرل بلاول اورنبیل گبول کی اس ویڈیو پر ردِ عمل کا اظہارکرتے ہوئے سعید غنی نے بتایا تھا کہ اس ویڈیو میں بلاول بھٹو نے نبیل گبول سے کہا تھا کہ کیا ساری بات یہیں کرلو گے جس پرنبیل گبول کو پیچھے ہٹنا پڑا تھا۔