میئر کراچی کی گڑھی خدا بخش آمد، شہداء مزاروں پر حاضری

لاڑکانہ(امت نیوز) کراچی کے نومنتخب میئر مرتضی وہاب نے گڑھی خدا بخش بھٹو میں شہید بینظیر بھٹو ، شہید ذوالفقار علی بھٹو اور دیگر شہیدوں کی مزار پر حاضری دیکر پھولوں کی چادر چڑھائی اور فاتحہ بھی کی۔ اس موقع پر میڈیا سے گفتگو کرتے ہوئے کہا کہ کراچی بلدیاتی انتخابات میں جیتنے والے میئر ، ڈپٹی میئر ، چیئرمین ، وائس چیئرمین ، یوسی چیئرمین سمیت قافلے کی صورت میں یہاں آئے ہیں تاکہ شہیدوں کو خراج عقیدت پیش کرسکیں،انہوں نے کہا کہ شہید بھٹو و بی بی کا فلسفہ تھا کہ طاقت کا سرچشمہ عوام ہے اور ہم عوام کی خدمت کرینگے۔

وزیر اعلی سندھ نے سندھ میں زبردست حکومت کی اور پیپلز پارٹی کو سندھ میں مزید مضبوط بھی کیا، عام آدمی کے مسائل کا حل آصف زرداری اوربلاول بھٹو زرداری کے پاس ہے ، جو عوام کو مسائل سے نکالنا چاہتے ہیں۔میئر کراچی مرتضی ٰوہاب نے کہا کہ میں یہاں شہیدوں کے مزار پر وعدہ کرتا ہوں جو عوام نے بلاول کو مینڈیٹ دیا ہے اس پر پورا اترینگے، عام آدمی کو کراچی میں مسائل درپیش ہیں وعدہ کرتا ہوں کو ان کو حل کرنے کی کوشش کرینگے۔