کراچی میں مین ہول، گڑھے میں گرکر 3 بچے جاں بحق

کراچی:مختلف علاقوں  مین ہول اور پانی کے گڑھے میں گرکر 3 بچے جاں بحق، گھروں میں کہرام برپا ہوگیا۔ تفصیلات کے مطابق اتحاد ٹاون میں پانی کے گڑھے میں گرکر 2 بچے جاں بحق ہوگئے۔ عینی شاہدین کے مطابق پہلے ایک لڑکا گڑھے میں گرا، دوسرا لڑکا اسے بچانے گیا تو وہ بھی گرگیا۔شور مچانے پر لوگ جمع ہوگئے، جنہوں نے بچوں کو نکال کر اسپتال منتقل کیا تاہم ڈاکٹرز نے موت کی تصدیق کردی۔

بچوں کی شناخت 14 سالہ عبید ولد بابر خان اور 15 سالہ عدیل ولد ہارون کے ناموں سے ہوئی۔ورثا اور علاقہ مکینوں نے انتظامیہ پر شدید غم و غصے کا اظہار کیا۔ان کا کہنا تھا کہ ہرطرف مسائل کے انبار ہیں لیکن کوئی سنوائی نہیں۔ادھر سپرہائی وے ذکریا گوٹھ کے قریب گھر کے باہر کھیلتے ہوئے 3 سالہ بچہ ببلو ولد عمران مین ہول میں گرکر جاں بحق ہوگیا، بچے کی لاش اسپتال منتقل کردی گئی۔