الیکشن کمیشن نے چیئرمین پی ٹی آئی کو 5 سال کیلئے نااہل قرار دیدیا

اسلام آباد : الیکشن کمیشن آف پاکستان ( ای سی پی) نے چیئرمین پاکستان تحریک انصاف ( پی ٹی آئی ) کو پانچ سال کیلئے نااہل قرار دیتے ہوئے قومی اسمبلی کی نشست این اے 45 سے ڈی نوٹیفائی کردیا۔

الیکشن کمیشن کی جانب سے چیئرمین پی ٹی آئی کی 5 سالہ نااہلی کا نوٹیفکیشن جاری کر دیا گیا ہے جس کے مطابق ایڈیشنل سیشن جج اسلام آباد کے فیصلے کے مطابق چیئرمین پی ٹی آئی کرپٹ پریکٹسز کے مرتکب قرار پائے۔

الیکشن کمیشن کی جانب سے کہا گیا کہ چیئرمین پی ٹی آئی کو 3 سال قید،1 لاکھ روپے جرمانہ کی سزا ہوئی جس کے بعد وہ آئین کے آرٹیکل 63 ون ایچ کے تحت نااہل ہوئے ہیں۔ علاوہ ازیں الیکشن کمیشن نے چیئرمین پی ٹی آئی کو قومی اسمبلی کی نشست این اے 45 سے ڈی نوٹیفائی بھی کردیا ہے۔