قبلہ اول کی آزادی تک جدوجہد جاری رکھیں گے، ڈاکٹرخالد قدومی

لاہور:  حماس کے ترجمان ڈاکٹر خالد قدومی نے لاہور میں سینئرصحافیوں،تجزیہ کاروں اور اینکر پرسنز سے گفتگو کرتے ہوئے کہا ہے حماس القدس قبلہ اول کی آزادی تک اپنی جدوجہد جاری رکھے گی۔ فلسطین فلسطینیوں کا ہے۔اسرائیل ایک ناجائز ریاست ہے حماس کے طوفان اقصیٰ سے اسرائیل اور اُس کے سرپرست امریکا کو پیغام مل گیا کہ اہل فلسطین اپنی سرزمین کا دفاع کرنا جانتے ہیں، ہم کسی صورت غزہ کو نہیں چھوڑ یں گے اور کسی قربانی سے دریغ نہیں کریں گے۔امریکا اور اسرائیل دنیا میں تنہا اور تمام حق پرست اہل فلسطین کے ساتھ کھڑے ہیں۔

ڈاکٹر خالد قدومی نے کہا غزہ میں 7 اکتوبر سے اب تک 20ہزار سے زائد بچے، خواتین، بزرگ اورجوان شہید ہوگئے، جب کہ اہل فلسطین کے حوصلے مزید بلند ہوئے ہیں۔ حماس نے اسرائیلی فوج اور اُس کی عسکری قوت کو ناقابل تلافی نقصان پہنچایا جس کا مغربی میڈیا ذکر نہیں کررہا ہے لیکن صہیونی میڈیا اپنے ساڑھے چار ہزار فوجی افسروں اور جوانوں کی ہلاکت کا دبے انداز میں ذکرکررہا ہے، اسرائیل کے عوام نیتن یاہو کے خلاف ہوگئے ہیں۔

انہوں نے کہا فلسطینی پاکستان کو اپنا دوسرا گھر سمجھتا ہے۔ اہل پاکستان نے فلسطینی عوام سے اظہار یکجہتی کرکے ہمارے حوصلے اور بلند کردیے ہیں۔ پوری دنیا میں حق پرست لوگ اسرائیل امریکا کے خلاف سڑکوں پر نکل کر فلسطینیوں سے اظہار یکجہتی کررہے ہیں جو کہ ہماری اخلاقی، سیاسی، سفارتی اور خارجی فتح کے مترادف ہے۔ایک سوال کے جواب میں ڈاکٹر خالد قدومی نے کہاگریٹر اسرائیل کے عزائم کو حماس نے خاک آلود کردیا ہے۔