فواد چوہدری نے جیل میں اوپن ٹرائل کی درخواست دائر کردی

راولپنڈی (اُمت نیوز)توہین الیکشن کمیشن کیس میں سابق وفاقی وزیر فواد چوہدری نے اڈیالہ جیل میں اوپن ٹرائل کی درخواست دائر کردی۔

فواد چوہدری نے وکیل فیصل چوہدری کے ذریعے اوپن ٹرائل کی درخواست اڈیالہ جیل میں دائر کی جس میں استدعا کی گئی میڈیا کو جیل ٹرائل کورٹ کور کرنے کی اجازت دی جائے۔

درخواست میں کہا گیا کہ مجھے فیملی اوروکلا سے ملنے کی اجازت نہیں، شفافیت کے لیے جیل سماعت اوپن کی جائے، میڈیا کے بغیرٹرائل قابل اعتراض ہے، لہٰذا اوپن ٹرائل کا حکم دیا جائے۔

واضح رہے کہ پاکستان تحریک انصاف (پی ٹی آئی) کے بانی عمران خان اور سابق رہنما فواد چوہدری کے خلاف توہین الیکشن کمیشن کیس میں آج فردِ جرم کی کارروائی کی جائے گی۔

الیکشن کمیشن آج اڈیالہ جیل میں کیس کی سماعت کرے گا۔

گزشتہ سماعت پر عمران خان کے وکیل شعیب شاہین کی عدم موجودگی پر فرد جرم عائد نہیں کی گئی تھی۔

الیکشن کمیشن دو مرتبہ عمران خان اور فواد چوہدری کو فرد جرم عائد کرنے کے لیے بلا چکا ہے، تاہم پی ٹی آئی کے وکلا نے عمران خان پر فرد جرم عائد نہیں ہونے دی۔