مخصوص نشستیں،214سے زائد ارکان اسمبلی کے پی ٹی آئی سے وابستگی کے حلف نامے جمع

اسلام آباد: مخصوص نشستوں سے متعلق سپریم کورٹ کے فیصلے پر عملدرآمد کرتے ہوئے214سے زائد ارکان اسمبلی نے پاکستان تحریک انصاف (پی ٹی آئی) سے وابستگی کے حلف نامے جمع کرا دیے۔

35 ارکان قومی اسمبلی نے پاکستان تحریک انصاف سے وابستگی کے حلف نامے جمع کرا ئے۔ذرائع کے مطابق پی ٹی آئی سندھ کے 9 ایم پی ایز نے بھی وابستگی سرٹیفکیٹ پارٹی کو جمع کرا دیے، پنجاب سے 100 سے زائد ارکان نے پارٹی میں شمولیت اختیار کرنے کے سرٹیفکیٹ جمع کرائے۔

دوسری جانب وزیر اعلیٰ خیبر پختونخوا علی امین گنڈا پور حلف نامے کے معاملے پر شش وپنج کا شکار ہیں جبکہ چیئرمین پی ٹی آئی بیرسٹر گوہر، اپوزیشن لیڈر عمر ایوب اور علی اصغر نے تاحال وابستگی سرٹیفکیٹ جمع نہیں کرائے۔

ادھر خیبر پختونخوا اسمبلی کے 70 سے زائد ممبران نے بھی حلف نامے جمع کرا دیئے۔ذرائع کے مطابق ممبران نے حلف نامے وزیراعلیٰ علی امین گنڈا پور کے پاس جمع کرائے، باقی ممبران بھی جلد حلف نامے جمع کرائیں گے، ممبران نے جمع کرائے گئے حلف نامے میں لکھا کہ پی ٹی آئی میں تھے اور رہیں گے، پی ٹی آئی کے پلیٹ فارم سے ہی الیکشن لڑا۔

پی ٹی آئی قیادت کا پارٹی وابستگی سرٹیفکیٹ سے متعلق مشاورت کا عمل جاری ہے۔واضح رہے کہ سپریم کورٹ نے سنی اتحاد کونسل کی مخصوص نشستوں کے کیس میں پشاور ہائی کورٹ اور الیکشن کمیشن کا فیصلہ کالعدم قرار دیتے ہوئے پاکستان تحریک انصاف کو مخصوص نشستوں کا حقدار قرار دے دیا تھا۔