ایران میں طے شدہ فوجی اہداف کو نشانہ بنایا ہے،اسرائیل

 

اسرائیلی فوجی ترجمان کا کہنا ہے کہ اسرائیلی فوج نے ایرانی حملوں کے جواب میں کارروائی مکمل کر لی۔

غیر ملکی خبر رساں ادارے کے مطابق اسرائیلی فوجی ترجمان نے کہا ہے کہ تازہ حملوں میں ایران میں طے شدہ فوجی اہداف کو نشانہ بنایا گیا ہے۔

اسرائیلی فوج کے ترجمان کا کہنا ہے کہ اسرائیل کو درپیش فوری خطرات کو دور کر دیا گیا ہے، ایران نے ان حملوں کے جواب میں حملے کیے تو جواب دیا جائے گا۔

ادھر اسرائیلی سرکاری عہدیدار نے کہا ہے کہ ایران کی فوجی تنصیبات پر اسرائیلی حملے ختم ہو گئے، ایران پر اسرائیلی حملوں میں 20 مقامات کو نشانہ بنایا گیا۔

امریکی اخبار نیویارک ٹائمز کا کہنا ہے کہ ایران کی فوجی تنصیبات پر اسرائیلی حملے کئی گھنٹے جاری رہے۔

دوسری جانب ایران کے فوجی حکام کا کہنا ہے کہ تہران کے قریب 3 مختلف مقامات پر حملوں کو ناکام بنانے کے لیے فضائی دفاعی نظام استعمال کیا گیا۔

غیر ملکی خبر رساں ادارے کے مطابق ایران نے اگلے نوٹس تک اپنی تمام پروازیں منسوخ کر دی ہیں۔

ایرانی خبر ایجنسی کے ذرائع کا کہنا ہے کہ ایران کسی بھی جارحیت کا جواب دینے کا حق محفوظ رکھتا ہے۔

ایرانی فوجی حکام نے کہا ہے کہ اسرائیل کو مناسب ردِعمل کا سامنا کرنا پڑے گا۔

اسرائیلی اور امریکی حکام کا دعویٰ ہے کہ ایران پر حملہ 3 مرحلوں میں کیا گیا، دوسرے اور تیسرے حملوں میں ایران کی میزائل اور ڈرون حملے کرنے کی صلاحیت کو نشانہ بنایا گیا۔

واضح رہے کہ امریکی میڈیا کا کہنا تھا کہ اسرائیل نے ایران پر فضائی حملوں کا آغاز کر دیا ہے جبکہ ایران کے سرکاری میڈیا نے تہران میں دھماکوں کی تصدیق کی ہے۔

اسرائیلی فوج نے یکے بعد دیگرے ایران میں فوجی اہداف پر 2 بار کئی فضائی حملے کیے، اسرائیل نے شام میں بھی متعدد فوجی تنصیبات کو نشانہ بنایا۔