جی ایچ کیو حملہ کیس، عمران خان سمیت دیگر ملزموں پر فرد جرم مؤخر

راولپنڈی(اُمت نیوز)سانحہ 9مئی کے جی ایچ کیو حملہ کیس میں بانی پی ٹی آئی عمران خان سمیت دیگر ملزموں پر فرد جرم چوتھی بار مؤخر ہوگئی۔

انسداد دہشت گردی عدالت راولپنڈی کی خصوصی عدالت کے جج امجد علی شاہ نے کیس کی سماعت کی، کیس میں مزید 10 ملزموں نے عدم ثبوت کی بنیاد پر بریت کی درخواستیں دائر کر دی ہیں۔

عدالت کے باہر میڈیا سے گفتگو میں اسپیشل پراسیکیوٹر راجہ اکرام امین منہاس نے کہا کہ ہمارے پاس مکمل ثبوت ہیں کوئی نہیں کہہ سکتا کہ جی ایچ کیو پر حملہ نہیں ہوا، اگر آپ سچے ہیں تو عدالت کا سامنا کیوں نہیں کر رہے،انہوں نے کہا کہ آج بھی ملزمان کی کوشش ہے کہ سماعت میں تاخیر ہو، ہم نے عدالت سے استدعا کی ہے کہ روزانہ کی بنیاد پر سماعت کریں، ملزمان نے آج بھی حاضری سے استثنا کی درخواست کی ہے اور کوشش کی جا رہی ہے کہ عدالت کے ماحول کو خراب کیا جائے۔

اسپیشل پراسیکیوٹر نے بتایا کہ اس کیس میں 119 ملزمان ہیں اور حاضری مکمل نہ ہو تو فرد جرم نہیں لگ سکتی، ہم نے عدالت سے کہا ہے کہ ان کی ضمانتیں منسوخ کی جائیں کیونکہ یہ ضمانتوں کا غلط استمال کر رہے ہیں۔ کیس میں عمران خان سمیت 143 سے زائد ملزم نامزد ہیں جبکہ ذوالفقار بخاری، شہباز گل سمیت 23 ملزم اشتہاری ہیں، نامزد ملزموں پر بیرون ممالک جانے پر پابندی بھی عائد ہے۔