عمران خان سے ملنے والے کچھ لوگ کمپرومائزڈ ہیں، حامد رضا

اسلام آباد: سنی اتحاد کونسل کے سربراہ صاحبزادہ حامد رضا خان اور پنجاب اسمبلی میں اپوزیشن لیڈر احمد خان بچھر کو پولیس نے اڈیالہ جیل جانے سے روک دیا۔ اس موقع پر حامد رضا نے کہا کہ عمران خان سے جیل میں ملنے جانے والے کچھ لوگ کمپرومائزڈ ہیں۔

صاحبزادہ حامد رضا نے راولپنڈی میں اڈیالہ جیل کے باہر میڈیا سے گفتگو کرتے ہوئے کہا کہ بانی پی ٹی آئی عمران خان سے ملاقاتوں کو لے کر پارٹی میں تشویش ہے۔

انہوں نے کہا کہ کچھ لوگوں کے متعلق عام رائے ہے کہ وہ کمپرومائزڈ ہیں، لیکن میرا نام کبھی بھی کمپرومائزڈ لوگوں کی فہرست میں شامل نہیں ہوگا، میں کمپرومائز پر لعنت بھیجتا ہوں۔

ان کا کہنا تھا کہ سلمان اکرم جو فہرست بھیجتے ہیں ان کو ملاقات کی اجازت نہیں دی جاتی، باقی لوگوں کو دی جاتی ہے۔

حامد رضا کا مزید کہنا تھا کہ چیف جسٹس نے سلمان صفدر کو ملاقات کا کہا لیکن انہیں ملنے نہیں دیا جا رہا، ہمارے پاس کوئی راستہ نہیں بچا کہ ہم یہاں پر امن طور پر آنے کی کال دیں۔