ترکیہ کا بحری جہاز خیر سگالی دورے پر کراچی پہنچ گیا

راولپنڈی : ترک بحری جہاز TCG  BÜYÜKADA خیر سگالی دورے پر کراچی پہنچ گیا۔ آئی ایس پی آرکے مطابق کراچی بندرگاہ پر TCG BÜYÜKADA کا پرتپاک استقبال کیا گیا،  دورے کے دوران پاک ترک بحری تعاون اور پیشہ ورانہ امور پر تبادلہ خیال ہوگا ۔

آئی ایس پی آرکے مطابق اس دورے کا مقصد دونوں بحری افواج کے درمیان باہمی افہام و تفہیم، ہم آہنگی اور بحری تعاون کو فروغ دینا ہے۔ ترک بحری جہاز کی آمد پاک ترک لازوال دوستی اور بھائی چارے کی علامت ہے ۔

ترک بحری جہاز کا یہ خیر سگالی دورہ پاکستان اور ترکیہ کے مابین مضبوط ہوتے ہوئے بحری تعلقات کا مظہر ہے، جو دونوں برادر ممالک کے درمیان صدیوں پر محیط تاریخی، ثقافتی اور تزویراتی روابط اور باہمی اعتماد پر استوار ہیں۔