کراچی میں کل ہلکی بارش کی پیش گوئی

کراچی میں شدید گرمی کی لہر جاری ہے، تاہم شہریوں کے لیے خوشخبری ہے کہ محکمہ موسمیات نے کل سے ہلکی بارش کی پیش گوئی کی ہے۔ آئندہ 24 گھنٹوں کے دوران سمندری ہوائیں بحال ہونے سے درجہ حرارت میں کچھ حد تک کمی آنے کی توقع ہے۔

محکمہ موسمیات کے مطابق کراچی میں کل ہلکی بارش متوقع ہے۔ ساتھ ہی سمندری ہوائیں بحال ہونے کا بھی امکان ہے جس کے نتیجے میں گرمی کی شدت میں کچھ کمی آئے گی۔

صوبہ سندھ کے بیشتر علاقوں میں موسم شدید گرم اور خشک رہے گا، تاہم ہوائیں چلنے سے گرمی کی شدت میں کمی آسکتی ہے۔

دوسری جانب ملک کے دیگر حصوں میں کہیں کہیں بارش کا سلسلہ شروع ہو چکا ہے۔ ڈیرہ مراد جمالی، نوشہرو فیروز اور گردونواح میں بادل خوب برسے، جس سے گرمی کا زور ٹوٹا اور موسم خوشگوار ہو گیا۔

محکمہ موسمیات نے گلگت بلتستان اور آزاد کشمیر میں گرج چمک کے ساتھ بارش کی پیش گوئی کی ہے، جب کہ پشاور، سوات، مالاکنڈ، ایبٹ آباد سمیت خیبرپختونخوا کے مختلف علاقوں میں بارش کا امکان ہے۔ جبکہ پنجاب میں راولپنڈی، مری، اٹک اور جہلم میں بھی بارش متوقع ہے۔