عمران خان جیل کے ایک کمرے نہیں، کمپلیکس میں رہتے ہیں، سپرنٹنڈنٹ اڈیالہ جیل

راولپنڈی: سپرنٹنڈنٹ اڈیالہ جیل راولپنڈی کا کہنا ہے کہ بانیٔ پی ٹی آئی کو جیل میں بی کلاس کی تمام سہولتیں حاصل ہیں، انہیں دستیاب سہولیات کسی بھی دوسرے قیدی کے پاس نہیں۔ جن میں خوراک، مطالعۂ کتب و اخبارات سمیت ورزش اور واک شامل ہیں۔

سپرنٹنڈنٹ اڈیالہ جیل عبدالغفور انجم نے واضح کیا ہے کہ بانی پی ٹی آئی کو جیل میں خوراک، صحت، کتابیں، اخبارات، واک، ورزش کی سہولت میسر ہے، 7 سیلز پر مشتمل کمپلیکس میں رکھا گیا ہے، چہل قدمی کیلئے کھلا صحن بھی موجود ہے۔

سپرنٹنڈنٹ جیل نے بتایا کہ بانیٔ پی ٹی آئی کو کھانا تیار کرانے کےلیے ایک قیدی باورچی بھی دیا گیا ہے، یہ باورچی ناشتہ، دوپہر اور شام کا کھانا بانیٔ پی ٹی آئی کی خواہش کے مطابق بناتا ہے۔

جیل انتظامیہ نے بتایا ہے کہ بانیٔ پی ٹی آئی جب سے جیل میں ہیں انہوں نے 413 مرتبہ ایکس پر ٹوئٹ کرایا ہے، ٹوئٹ کے ذریعے بانیٔ پی ٹی آئی نے ورکرز کو سیاسی سرگرمیوں کی ہدایات جاری کیں۔

جیل انتظامیہ کے مطابق 3 مہینوں میں 66 خواتین اور حضرات نے بانیٔ پی ٹی آئی سے جیل میں ملاقاتیں کیں، ملاقات کرنے والوں میں پارٹی لیڈرز، فیملی ممبرز اور وکلاء شامل تھے۔

جیل انتظامیہ کا کہنا ہے کہ جیل میں متعین ڈاکٹرز بانیٔ پی ٹی آئی کا طبی معائنہ کرتے ہیں، ان کے تمام اعضائے رئیسہ کا معائنہ کیا جاتا ہے، 2 ہفتوں میں بانیٔ پی ٹی آئی کو کسی قسم کی بیماری یا عارضہ رپورٹ نہیں ہوا۔

جیل انتظامیہ نے بتایا ہے کہ بانیٔ پی ٹی آئی مکمل صحت مند ہیں، ان کے اعضائے رئیسہ مقررہ معیار کے مطابق ہیں، انہیں واک اور ایکسر سائز کی مکمل سہولتیں میسر ہیں، وہ اپنے احاطے کے کھلے صحن میں 2 گھنٹے روزانہ ایکسر سائز کرتے ہیں۔

جیل انتظامیہ کے مطابق 2 سال میں بانیٔ پی ٹی آئی عالمی میڈیا سے بھی انٹریکشن کر چکے ہیں، وہ جیل سے مین اسٹریم میڈیا اور اخبارات سے مخاطب ہوتے رہے ہیں۔

سپرنٹنڈنٹ اڈیالہ جیل کے مطابق بانیٔ پی ٹی آئی سے متعلق سوشل میڈیا اور میڈیا پر آئی افواہوں میں کوئی صداقت نہیں، سستی شہرت حاصل کرنے کے لیے سنسنی پھیلائی جا رہی ہے، جیل میں بانیٔ پی ٹی آئی کے ساتھ کوئی امتیازی سلوک نہیں کیا جا رہا۔