کے پی اسمبلی اجلاس، مخصوص نشستوں پر منتخب ارکان آج حلف اٹھائیں گے

 

پشاور: خیبرپختونخوا اسمبلی کا ہنگامہ خیز اجلاس کچھ دیر بعد ہوگا، اجلاس میں شرکت کیلئے اراکین اسمبلی پہنچنا شروع ہوگئے۔

کے پی اسمبلی اجلاس میں 21 خواتین اور 4 اقلیتوں کی مخصوص نشستوں پر منتخب اراکین سے حلف لیا جائے گا۔

حلف اٹھانے والوں میں جمعیت علماء اسلام اور ن لیگ کی 7 ، 7 خواتین پیپلزپارٹی کی 4 خواتین شامل ہیں، اے این پی کی 2 اور پی ٹی آئی پی کی ایک خاتون سے حلف لیا جائے گا، جے یو آئی کی دو اقلیت نشست پر منتخب اراکین عسکر پرویز اور گورپال سنگھ سے بھی حلف لیا جائے گا۔

ن لیگ کے سریش کمار اور پیپلزپارٹی کے کوٹے پر منتخب بہاری لالا بھی حلف اٹھائیں گے، اسمبلی اجلاس میں مہمانوں کی آمد پر پابندی عائد کر دی گئی ہے۔

دنیا نیوز سے گفتگو میں گورنر خیبرپختونخوا فیصل کریم کنڈی نے خدشات کا اظہار کرتے ہوئے کہا ہے کہ مخصوص نشستوں پر آج حلف نہیں لیا جائے گا، جو ماحول بنا ہے اس میں مخصوص نشستوں پر حلف مشکل نظر آ رہا ہے، ہو سکتا ہے کورم کی نشاندہی کر کے اجلاس ملتوی کر دیا جائے۔

انہوں نے کہا کہ سینیٹ کے الیکشن ضرور ہوں گے، پیر کو نہیں تو منگل کو ہو جائیں گے، مخصوص نشستوں پر حلف نہ لیا گیا تو ارکان عدالت جائیں گے، ہوسکتا ہے عدالت مجھے یا پھر سپیکر کو حلف لینے کا حکم دے۔