پشاور میں ڈیٹا کی تشریح اور استعمال پر تین روزہ ورکشاپ کا آغاز

پشاور، پاکستان ادارہ شماریات (پی بی ایس) اور اقوام متحدہ کا فنڈ برائے آبادی (یو این ایف پی اے) کے باہمی اشتراک سے پشاور کے مقامی ہوٹل میں "ڈیٹا کی تشریح اور استعمال” کے موضوع پر تین روزہ تربیتی ورکشاپ کا باضابطہ آغاز ہوگیا۔ یہ ورکشاپ 29 تا 31 جولائی 2025ء منعقد ہو رہی ہے جس کا مقصد خیبرپختونخوا کے سرکاری اداروں کو پاکستان ادارہ شماریات کے وسیع ڈیٹابینک کے مؤثر استعمال کیلئے بااختیار بنانا اور شواہد کی بنیاد پر منصوبہ بندی کو فروغ دینا ہے۔

ورکشاپ میں خیبرپختونخوا کے مختلف محکموں بشمول منصوبہ بندی و ترقیات، تعلیم، صحت، خزانہ، بلدیات و دیہی ترقی، مواصلات و تعمیرات، زراعت،محصلات، محنت و روزگار اور معیشت سے تعلق رکھنے والے سینئر افسران، محققین، اور ماہرین کی بھرپور شرکت دیکھنے میں آئی۔

پاکستان ادارہ شماریات کے سینئر ممبر (سپورٹ سروسز، ریسورس مینجمنٹ)محمد سرور گوندل (ستارہ امتیاز) نے افتتاحی نشست سے خطاب میں ادارے کی اہم سرگرمیوں اور دستیاب ڈیٹاسیٹس پر مبنی پالیسی سازی میں پی بی ایس کے کردار پر مفصل روشنی ڈالی۔ انہوں نے شرکاء کو ڈیٹا کے عملی استعمال کی مثالیں بھی پیش کیں اور ڈیٹا فیسٹ 2025ء میں شرکت کی دعوت دی جو 11-12 نومبر 2025ء کو پاک-چائنہ فرینڈشپ سنٹر، اسلام آباد میں منعقد ہوگا۔

چیف اسٹیٹسٹیشن پاکستان، ڈاکٹر نعیم ظفر (ستارہ امتیاز) نے ورکشاپ کی صدارت کرتے ہوئے پائیدار ترقی اور مؤثر طرزِ حکمرانی میں قابلِ اعتماد شماریاتی ڈیٹا کے کلیدی کردار کو اجاگر کیا۔ انہوں نے اس عزم کا اعادہ کیا کہ پی بی ایس قومی و صوبائی سطح پر تمام شراکت داروں کی ڈیٹا تک رسائی اور استعمال کو مزید آسان بنائے گا۔

اقوام متحدہ کے فنڈ برائے ابادی(یو این ایف پی اے) کی صوبائی سربراہ مہہ جبین قاضی نے پالیسی سازی میں ڈیٹا کے کردار پر روشنی ڈالتے ہوئے کہا کہ پائیدار ترقیاتی اہداف (ایس ڈی جیز) کے حصول کیلئے مؤثر ڈیٹا پر مبنی فیصلہ سازی ناگزیر ہے۔

ایڈیشنل سیکرٹری تعلیم خیبرپختونخوا فیض عالم نے صوبائی حکومت کی جانب سے ورکشاپ کے بروقت انعقاد کو سراہا اور کہا کہ وزیراعلیٰ خیبرپختونخوا کے وژن اور چیف سیکرٹری کی ہدایت پر تمام محکمے مؤثر روڈمیپ تشکیل دینے کے پابند ہیں، جس کیلئے اس نوعیت کی تربیت نہایت اہم ہے۔

ورکشاپ کے دوران تعلیم، صحت، پانی و صفائی، معاشرتی معیار، تجارتی، معاشی اور افرادی قوت کے اعدادوشمار پر تفصیلی سیشنز، انٹرایکٹو ڈیش بورڈز کی براہِ راست نمائش اور گروپ سرگرمیوں کے ذریعے عملی مشقیں کی جا رہی ہیں۔ اس کے علاوہ ایک ڈیٹا ڈسیمینیشن ڈیسک بھی قائم کیا گیا ہے تاکہ شرکاء کو فوری طور پر مطلوبہ معلومات فراہم کی جا سکیں۔

یہ تربیتی پروگرام خیبرپختونخوا میں ایک مضبوط، مؤثر اور شواہد پر مبنی حکمرانی کے فروغ کی جانب ایک اہم پیش رفت ہے جو بین المحکمہ جاتی اشتراک اور شفاف فیصلہ سازی کو ایک نئی جہت فراہم کرے گا۔