وزیراعلیٰ پنجاب کے اعزاز میں تھائی لینڈ کے سابق وزیراعظم کی جانب سے عشائیہ

بنکاک: وزیراعلیٰ پنجاب مریم نواز شریف کے اعزاز میں تھائی لینڈ کے سابق وزیراعظم اور ٹیلی کمیونیکیشن کے شعبے کی معروف کاروباری شخصیت تھکسان شینا وترا نے عشائیہ دیا۔ اس موقع پر تھائی لینڈ کی کم عمر ترین سابق خاتون وزیراعظم پائیتونگترن شینا وترا بھی شریک ہوئیں۔تقریب میں تھکسان شینا وترا اور ان کی صاحبزادی نے مریم نواز شریف کا پرتپاک استقبال کیا اور سابق وزیراعظم نواز شریف کے لیے نیک خواہشات کا اظہار کیا۔ دونوں سابق وزرائے اعظم نے مریم نواز کے عوامی فلاحی منصوبوں اور ترقیاتی وژن کو سراہا۔ تھکسان شینا وترا نے کہا کہ مریم نواز اور ان کے والد کی عوامی جدوجہد متاثر کن ہے۔مریم نواز نے بھی تھائی قیادت کی عوامی خدمات اور معیشتی اصلاحات کو خراج تحسین پیش کرتے ہوئے کہا کہ پاکستان اور تھائی لینڈ کے تعلقات باہمی احترام، معاشی تعاون اور ثقافتی ہم آہنگی پر مبنی ہیں۔ انہوں نے کہا کہ پنجاب ٹیکسٹائل، زراعت، سیاحت اور ٹیکنالوجی کے شعبوں میں سرمایہ کاری کو فروغ دینا چاہتا ہے، جبکہ تھائی کاروباری برادری صوبے کی مراعات اور علاقائی منڈیوں تک آسان رسائی سے فائدہ اٹھا سکتی ہے۔وزیراعلیٰ پنجاب نے مزید کہا کہ ثقافتی سفارت کاری، تعلیم اور سیاحت عوام کو قریب لانے کا مؤثر ذریعہ ہیں، جبکہ پنجاب حکومت نوجوانوں کو جدید شعبوں میں ہنرمند بنانے کے لیے "ڈیجیٹل نیشن وژن” پر کام کر رہی ہے۔