اپوزیشن اراکین کا گورنر سے حلف، اسپیکر کا ماننے سے انکار

پشاور: اسپیکرخیبرپختونخوا اسمبلی بابر سلیم سواتی نے 25 مخصوص نشستوں کے ارکان کی گورنر کے سامنے حلف برداری کو غیر آئینی قرار دیتے ہوئے آج دوبارہ حلف لینے کی ہدایت جاری کر دی۔ تاہم اپوزیشن اراکین نے دوبارہ حلف اٹھانے سے انکارکر دیا ۔

خیبرپختونخوا اسمبلی کی 25 مخصوص نشستوں پر حلف لینے کے معاملے نے نیا رخ اختیار کر لیا ہے۔ اسپیکر اسمبلی بابر سلیم سواتی نے گورنر کے سامنے ارکان سے لیے گئے حلف کو غیر آئینی قرار دیتے ہوئے آج دوبارہ حلف لینے کی ہدایت کر دی ہے۔

اپوزیشن نے اسپیکر کی ہدایت کو مسترد کرتے ہوئے دوبارہ حلف لینے سے انکار کر دیا ہے۔ اپوزیشن ذرائع کے مطابق قائد حزب اختلاف ڈاکٹر عباداللہ کی زیر صدارت اسمبلی اجلاس سے قبل اپوزیشن جماعتوں کا ہنگامی اجلاس طلب کیا گیا۔

اپوزیشن کا موقف ہے کہ 25 ارکان نے 20 جولائی کو حلف اٹھا لیا تھا، اس لیے دوبارہ حلف لینے کی ضرورت نہیں۔

اپوزیشن کے مطابق گورنر خیبرپختونخوا نے یہ حلف چیف جسٹس پشاور ہائی کورٹ کے حکم پر دلایا تھا، اور یہ اختیار 26ویں آئینی ترمیم کے ذریعے آئین کے آرٹیکل 255 کے تحت حاصل ہوا تھا۔

اپوزیشن نے اسپیکر کے اقدام کو توہین عدالت قرار دیتے ہوئے کہا کہ اگر اسپیکر 20 جولائی کے حلف پر متفق نہیں تھے تو اسمبلی کا عملہ گورنر ہاؤس کیوں بھیجا گیا؟ ان کے بقول دوبارہ حلف لینے سے نہ صرف سینیٹ الیکشن بلکہ اسمبلی کی کارروائی بھی کالعدم ہو سکتی ہے۔