معروف مذہبی اسکالر انجینئر محمد علی مرزا گرفتار

جہلم: معروف مذہبی اسکالر انجینئر محمد علی مرزا کو گرفتار کرلیا گیا۔انہیں  جہلم سے گرفتار کیا گیا ہے۔ ان کی گرفتاری کے وقت پولیس کی سخت سیکیورٹی موجود تھی۔ انہیں سخت سیکیورٹی حصار میں تھانے لے جایا گیا ۔ محمد علی مرزا کو تھری ایم پی او کے تحت گرفتار کیا گیا ہے۔

 انہیں نیشنل سائبر کرائم انویسٹی گیشن ایجنسی (این سی سی آئی اے) نے گرفتار کیا ہے۔ انہیں جہلم کے مشینی محلہ میں واقع اکیڈمی سے حراست میں لیا گیا۔ انجینئر محمد علی مرزا کے خلاف تھری ایم پی او کا آرڈر ڈپٹی کمشنر جہلم نے جاری کیا۔ تاحال ان کے خلاف کوئی ایف آئی آر سامنے نہیں آئی۔

 اس سے قبل وہ 2020 میں بھی گرفتار ہوئے تھے۔ یہ وہ وقت تھا جب انہیں سوشل میڈیا پر عروج حاصل ہورہا تھا۔4 مئی 2020 کو انجینئر محمد علی مرزا کو ایک ویڈیو وائرل ہونے کے بعد گرفتار کیا گیا تھا تاہم انہیں 6 مئی کو ہی ضمانت مل گئی تھی۔ اگرچہ عدالت نے ان کا 14 روزہ ریمانڈ دیا تھا لیکن انہوں نے عدالت سے رجوع کرکے ضمانت حاصل کرلی۔